Հայաստանի շուրջը ստեղծված իրադրությունը մտահոգում է Իրանին․ նրանք պատրաստ են ՀՀ-ի հետ ռազմական համագործակցության. Աբրահամյան

Իրանում տարբեր շրջանակների հետ ունեցածս հանդիպում-քննարկումների ժամանակ Սյունիքի հետ կապված թեման թերևս առանցքայինն էր: Այս մասին ֆեյսբուքյան իր էջում գրել է ԱԺ «Պատիվ ունեմ» խմբակցության քարտուղար Տիգրան Աբրահամյանը:

«Ընդ որում` քիչ չեն այն ուսումնասիրողները, որոնք Սյունիքի թեման Արցախի հետ մի հարթությունում են դիտարկում` և´ աշխարհագրական, և´ քաղաքական` իր ողջ հետևանքներով:

Եվ պատահական չէ, որ Արցախի՝ Ադրբեջանի վերահսկողության տակ գտնվելն ընկալվում է նաև որպես իրանական շահերին հասցված հսկայական վնաս:

Նույն տրամաբանությամբ, կարծիք կա, որ ինչ քայլեր էլ Հայաստանն ու Իրանը ձեռնարկեն Սյունիքի անվտանգության և կայունության համար, քանի Արցախն ադրբեջանցիների ձեռքում է, Սյունիքն ու Իրանն անընդհատ անվտանգային սպառնալիքների ներքո են լինելու:

Իրանցիների հետ շփումներում, ելույթներում ես, իհարկե, նաև հիշեցնում էի, որ Ադրբեջանի` նաև 44-օրյա պատերազմից հետո մեծաքանակ սպառազինության գնումներն ու բանակում իրականացվող թուրքական ռեֆորմները, Արցախի հարավային հատվածներում ռազմական ենթակառուցվածքներ ստեղծելը իրենց մասշտաբայնությամբ ցույց են տալիս, որ Ադրբեջանը, Թուրքիան և նրանց միջոցով անկայունության ձգտող արտատարածաշրջային ուժերը բացառապես Սյունիքի վրա չեն կենտրոնացած, և հիմնական հարվածը կարող է կենտրոնացվել Իրանի ուղղությամբ:

Հայաստանի ու հատկապես Սյունիքի շուրջը ստեղծված ռազմաքաղաքական իրադրությունն անչափ մտահոգում է Իրանին, և նրանք այդ ռիսկերի չեզոքացման ուղղությամբ պատրաստ են Հայաստանի հետ խոր համագործակցության տարբեր ձևաչափերի, առաջին հերթին` ռազմական:

Թե այս ռազմական գործակցությունն ինչ է ենթադրում, և որքանով է դրանով հետաքրքրված, շահագրված ՀՀ իշխանությունը, սա հարցի լրիվ այլ հարթություն է, որովհետև խնդիրը շատ բազմաշերտ է»‎,- գրել է Աբրահամյանը: