Նոր մարտահրավեր՝ Էրդողանին․ Թուրքիայի ընդդիմության պաշտոնանկ արված առաջնորդը պատրաստվում է նոր կուսակցություն ստեղծել
Թուրքիայի գլխավոր ընդդիմադիր կուսակցության պաշտոնանկ արված ղեկավար Օզգյուր Օզելը հայտարարել է նախագահ Ռեջեփ Թայիփ Էրդողանին հակազդելու նպատակով նոր կուսակցություն հիմնելու մտադրության մասին․ գրում է Associated Press-ը։
Օզելի հայտարարությունը հնչել է Ժողովրդահանրապետական կուսակցության (CHP) ղեկավարի պաշտոնից դատարանի որոշմամբ հեռացվելուց ամիսներ անց։ Քննադատները պնդում են, որ այդ որոշումը քաղաքական դրդապատճառներ ուներ և նպատակ ուներ թուլացնել ընդդիմությանը։
Նրա պաշտոնանկությունն, ինչպես նաև կուսակցության նախկին և ոչ այնքան մեծ ժողովրդականություն վայելող առաջնորդ Քեմալ Քըլըչդարօղլուի վերադարձը պաշտոնին, զայրույթի ալիք է առաջացրել CHP-ի բազմաթիվ աջակիցների շրջանում։
«Մենք հիմնում ենք մեր նոր կուսակցությունն՝ առաջին քայլը կատարելով մեր ժողովրդի կողմից ընտրված պատգամավորների հետ միասին։ Սրանք վճռական քայլեր են՝ ուղղված Թուրքիայում իշխանություն ստանձնելու մեր նպատակին», – խորհրդարանում CHP-ի պատգամավորների և այլ պաշտոնյաների առջև ունեցած ելույթում հայտարարել է Օզելը։
Հաղորդումների համաձայն՝ նոր քաղաքական շարժումը, որը կկոչվի Yeni Parti, թարգմանաբար՝ «Նոր կուսակցություն», պաշտոնապես իր գործունեությունը կսկսկի այս շաբաթ։
Ակնկալվում էր, որ Թուրքիայի 600 մանդատ ունեցող խորհրդարանում CHP-ի 135 պատգամավորներից շատերը կհեռանան կուսակցությունից և կմիանան նոր կուսակցությանը, որն, ըստ Օզելի, «զգալի առավելությամբ» կդառնա խորհրդարանի գլխավոր ընդդիմադիր ուժը։
Ավելացնել նոր մեկնաբանություն