Թբիլիսին Վրաստանի համար որևէ վտանգ չի տեսնում ՀՀ–ի և Ադրբեջանի միջև նոր ճանապարհի պատճառով
Որոշ քաղաքական գործիչներ փորձում են օգտագործել Հայաստանի և Ադրբեջանի հարաբերությունները և նվազեցնել Վրաստանի ռազմավարական գործառույթը, որին չի փոխարինի ոչ մի ճանապարհ։ İmedi հեռուստաալիքին տված հարցազրույցում այս մասին ասել է Վրաստանի արտգործնախարար Մակա Բոչորիշվիլին։
Գերատեսչության ղեկավարի խոսքով՝ նոր ճանապարհները միայն կբարձրացնեն տարածաշրջանի նշանակությունը կապակցվածության տեսանկյունից, քանի որ դա լավ է տարածաշրջանի համար։
«Իսկապես այստեղ ռիսկ չեմ տեսնում։ Վրաստանը քարտեզից չի անհետանա։ Պարզապես նրանք, ովքեր այսօր խոսում են կապերի մասին, չեն հիշատակում Վրաստանը որպես Եվրոպայի համար հիմնական կապ, և դա կասկածի տակ է դնում նրանց կոմպետենտությունը», – հավելել է նա։
Բոչորիշվիլին նշել է, որ Թբիլիսին կառուցվող նոր ճանապարհը չի դիտարկում որպես մրցակից Վրաստանով անցնող ճանապարհին։
«Չնայած նոր ուղղությունների ի հայտ գալուն, Վրաստանն անփոփոխ կերպով պահպանում է իր ռազմավարական նշանակությունը համաշխարհային աշխարհաքաղաքական քարտեզի վրա», – ասել է նախարարը։
Նրա խոսքով՝ նույնիսկ երեք կամ չորս նոր երթուղի ավելացնելու դեպքում դա բավարար չի լինի` հաշվի առնելով Արևմուտքի և Արևելքի միջև բեռնափոխադրումները։
Ավելացնել նոր մեկնաբանություն