Թեհրանը հերքել է Իրանի և ԱՄՆ-ի միջև բանակցություններ սկսելու մասին տեղեկությունները
Իրանի ԱԳՆ խոսնակ Իսմայիլ Բաղային հերքել է ԱՄՆ նախագահ Դոնալդ Թրամփի հայտարարությունը, թե կողմերը մոտ են համաձայնության և որ բանակցությունները կսկսվեն այսօր։
Նրա խոսքով՝ Իրանի արտաքին գործերի նախարար Աբբաս Արաղչին այսօր կմեկնի Իրաք՝ Արբաինի երթի արարողությանը մասնակցելու համար, սակայն այդ այցը մասնավոր է։ Նա հավելել է, որ իրանական բանակցային պատվիրակության մնացած անդամները գտնվում են երկրում։
Արտգործնախարարության խոսնակն ընդգծել է, որ Իրանի և Օմանի միջև Հորմուզի նեղուցի վերաբերյալ քննարկումները երկկողմ բանակցություններ են` Պարսից ծոցի երկու ափամերձ պետությունների միջև։
Բաղային նշել է, որ Օմանի հետ բանակցությունների նպատակն է ապահովել Հորմուզի նեղուցով նավագնացության ուղու ապահովությունը։
Նա հավելել է, որ այլ երկրներ կարող են խաղալ ինչպես ապակառուցողական, այնպես էլ կառուցողական դեր այս բանակցային գործընթացում։
Ավելացնել նոր մեկնաբանություն