Ադրբեջանը ձգտում է դառնալ Հարավային Կովկասում կարևոր տրանսպորտային հանգույց․ Վալիև
«Ադրբեջանը առավելագույն ջանքեր է գործադրում Հարավային Կովկասում կարևոր տրանսպորտային հանգույց դառնալու համար»,- Բաքվում կայացած «Ադրբեջան և Ուզբեկստան. փոխշահավետ համագործակցության նոր հեռանկարներ» թեմայով միջոցառմանը հայտարարել է Ուզբեկստանի միջազգային հարաբերությունների տեղեկատվական և վերլուծական կենտրոնի տնօրեն Սանջար Վալիևը։
Այս մասին հայտնում է ադրբեջանական «Report» կայքը։
«Ներկայումս Ադրբեջանն ու Ուզբեկստանը՝ Կենտրոնական Ասիայի և Կովկասի երկու խոշորագույն պետությունները, համատեղում են իրենց ներուժն ու հավակնոտ նպատակներ դնում։ Առևտրային և տնտեսական խնդիրները լուծելու համար մեր նախարարությունները ձեռնարկում են ամենաարդյունավետ միջոցները։ 2025 թվականը որպես «Բաքվի և Տաշքենդի տնտեսական համագործակցության տարի» որոշելը նորարարական քայլ էր այս հարցում»,- ասել է նա։
Ս. Վալիևն ընդգծել է, որ ներկայումս աշխարհում շատ բարդ գործընթացներ են տեղի ունենում, և երկրների միջև համագործակցության ներկա մակարդակը բավարար չէ դրանց լուծման համար։
«Այդ պատճառով համագործակցությունը շատ կարևոր է։ Մեր երկրները կողմ են, որ հարցերը հնարավորինս շուտ լուծվեն դիվանագիտական ճանապարհով»,- հավելել է նա։
Նշենք, որ «Ադրբեջան և Ուզբեկստան. փոխշահավետ համագործակցության նոր հեռանկարներ» խորագրով միջոցառումը համատեղ կազմակերպել են Միջազգային հարաբերությունների վերլուծության ադրբեջանական կենտրոնը (ICRI) և Ուզբեկստանի նախագահին կից Ռազմավարական և միջտարածաշրջանային հետազոտությունների ինստիտուտը։
Ադրբեջանը տարածաշրջանում «միջանցքի» տարբերակն է առաջարկում՝ հետապնդելով սեփական շահերը։
Ավելացնել նոր մեկնաբանություն