Առանց խաղաղ Մերձավոր Արևելքի, աշխարհում խաղաղության մասին խոսք լինել չի կարող. պետք է Պաղեստին անկախ պետություն ստեղծվի. Չինաստանի ԱԳՆ
Գազայի հատվածը պատկանում է պաղեստինցի ժողովրդին և հանդիսանում է պաղեստինյան տարածքի անբաժանելի մասը. այս մասին հայտարարել է Չինաստանի ԱԳ նախարար Վան Ին՝ ընդգծելով, որ Գազայի հատվածի կարգավիճակը բռնի փոխելու ցանկացած փորձ կհանգեցնի ոչ թե խաղաղության, այլ միայն հետագա ցնցումների ու քաոսի։
«Մենք աջակցում ենք Եգիպտոսի և արաբական պետությունների՝ Գազայի հատվածի խաղաղ վերականգնման ծրագրին... Ընդհանուր ընդունված կանոնները չեն կարող խախտվել։ Խոշոր պետությունները, որոնք իսկապես մտահոգ են Գազայի հատվածի բնակչության համար, պետք է նպաստեն կրակի լիարժեք և տևական դադարեցմանը, մեծացնեն մարդասիրական օգնությունը՝ հավատարիմ մնալով «Պաղեստինցիներն են կառավարում Պաղեստինը» սկզբունքին և նպաստեն Գազայի հատվածի վերականգնմանը», - ասել է նախարարը:
Նա ընդգծել է, որ առանց խաղաղ Մերձավոր Արևելքի, ամբողջ աշխարհում խաղաղության մասին խոսք լինել չի կարող. մերձավորարևելյան կարգավորման առանցքը մնում է պաղեստինյան հարցը։
«Պաղեստինա-իսրայելական հակամարտության երկարացման և սրման էությունն այն է, որ «երկու պետությունների» ծրագիրը կիսով չափ է իրականացված. Իսրայել պետությունը վաղուց է հիմնադրվել, իսկ պաղեստինյան պետության ստեղծումը հետաձգվել է անորոշ ժամանակով։ Ժամանակն է, որ միջազգային հանրությունը առաջնահերթություն տա երկու պետությունների ծրագրի շրջանակում Պաղեստին անկախ պետության ստեղծմանը։ Ի վերջո, սա է Պաղեստինի և Իսրայելի միջև իրական խաղաղության, և ընդհանրապես արաբների և հրեաների միջև երկարաժամկետ խաղաղության և ներդաշնակության երաշխիքը», - նշել է դիվանագետը։
Վան Ին հայտարարել է, որ որպես Մերձավոր Արևելքի ռազմավարական գործընկեր և արաբական աշխարհի վստահելի բարեկամ՝ Չինաստանը կշարունակի վճռականորեն իր ձայնը բարձրացնել հանուն արդարության, խաղաղության և զարգացման՝ աջակցելով Մերձավոր Արևելքի ժողովրդին:
Ավելացնել նոր մեկնաբանություն