Այսօր հոկտեմբերի 27-ի ոճրագործության 27-րդ տարելիցն է
Այսօր՝ հոկտեմբերի 27-ին, լրանում է Հայաստանի նորագույն պատմության ամենաողբերգական էջերից մեկի՝ 1999 թվականի խորհրդարանական ահաբեկչության 27-րդ տարելիցը։
1999 թվականի հոկտեմբերի 27-ին՝ ժամը 17։00-ի սահմաններում, երբ խորհրդարանում ընթանում էր կառավարության հետ հարցուպատասխանը, Նաիրի Հունանյանի գլխավորած զինված խմբավորումը ներխուժեց Ազգային ժողովի նիստերի դահլիճ և կրակ բացեց։
Ահաբեկչության հետևանքով գլխատվեց երկրի իշխանությունը. սպանվեցին ԱԺ նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանն ու Ռուբեն Միրոյանը, պատգամավորներ Արմենակ Արմենակյանը, Միքայել Քոթանյանը, Հենրիկ Աբրահամյանը և նախարար Լեոնարդ Պետրոսյանը։ Կրակոցների հետևանքով ևս ութ մարդ վիրավորվեց։
Զինված խմբավորումը մինչև հաջորդ առավոտ պատանդի կարգավիճակում պահեց խորհրդարանի պատգամավորներին և կառավարության անդամներին։ Եւ միայն հոկտեմբերի 28-ին՝ բանակցություններից հետո, հարձակվողները հանձնվեցին իրավապահ մարմիններին։
Տևական ժամանակ ընթացավ նախաքննություն, այդ ընթացքում եղան բազմաթիվ ձերբակալություններ, եղան մեղադրյալներ, որոնց մի մասի կարգավիճակը, սակայն, հետո փոխվեց և որպես վկա ազատ արձակվեցին, թեև՝ կասկածները հանրության շրջանում շարունակվում էին։
2003 թվականի դեկտեմբերին դատարանը Նաիրի Հունանյանին և նրա խմբի հինգ անդամներին դատապարտեց ցմահ ազատազրկման։
Չնայած անցած 27 տարիներին՝ գործի մի շարք հանգամանքներ շարունակում են մնալ հանրային քննարկումների առարկա։ Զոհերի հարազատները և հասարակության տարբեր ներկայացուցիչներ պնդում են, որ հանցագործության հնարավոր պատվիրատուների և կազմակերպիչների հարցերը լիարժեք պատասխան չեն ստացել։ Գործից անջատված մասով քննությունը շարունակվում է, սակայն այդ մասով մինչ օրս մեղադրյալներ չկան, թեև՝ ընթանում է նախաքննություն։
Ավելացնել նոր մեկնաբանություն