Եվրոպան պատրաստ է «առաջնորդել» Ուկրաինային անվտանգության երաշխիքներ տրամադրելու հարցում․ Ռյուտե
Եվրոպան պատրաստ է և ցանկանում է քայլ կատարել և առաջնորդի դեր ստանձնել Ուկրաինային անվտանգության երաշխիքների տրամադրման գործում։ Այս մասին Փարիզում տեղի ունեցած գագաթնաժողովից հետո X-ի իր էջում գրառում է կատարել ՆԱՏՕ-ի գլխավոր քարտուղար Մարկ Ռյուտեն։
«Պատրաստ և պատրաստակամ»: Ըստ իս՝ սա էր այսօր Փարիզում կայացած հանդիպման արդյունքը։ Եվրոպան պատրաստ է և պատրաստակամ քայլ կատարել, առաջնորդել Ուկրաինային անվտանգության երաշխիքների տրամադրման գործում։ Պատրաստ է և պատրաստակամ շատ ավելին ներդնել մեր անվտանգության համար»,- գրել է նա:
Ռյուտեն ընդգծել է մանրամասների հետագա հստակեցման անհրաժեշտությունը, սակայն վստահեցրել է, որ «հանձնառությունը հստակ է»:
Փետրվարի 18-ի գիշերը Ուկրաինայի նախագահ Վլադիմիր Զելենսկին Փարիզում եվրոպացի առաջնորդների գագաթնաժողովից հետո մանրամասներ է հայտնել Ֆրանսիայի նախագահ Էմանուել Մակրոնի հետ ունեցած զրույցից։ Նրա խոսքով՝ կողմերը, մասնավորապես, համաձայնեցրել են իրենց դիրքորոշումները Ուկրաինայի անվտանգության երաշխիքների վերաբերյալ։
Զելենսկին նշել է, որ իրենք ընդհանուր տեսլական ունեն այն մասին, որ պետք է լինեն հուսալի և ամուր անվտանգության երաշխիքներ։
Ուկրաինան ՆԱՏՕ-ին անդամակցությունը դիտարկում է որպես Ռուսաստանի հետագա հնարավոր ագրեսիան կանխելու առաջնային մեխանիզմ, սակայն Հյուսիսատլանտյան դաշինքը հայտարարել է, որ Ուկրաինայի անդամակցությունը չի կարող տեղի ունենալ այն ժամանակ, երբ երկրում պատերազմ է ընթանում։
Ավելացնել նոր մեկնաբանություն