Հավատում եմ, որ «Զանգեզուրի միջանցքը» կկրի Իլհամ Ալիևի անունը. Ադրբեջանի Միլլի Մեջլիսի առաջին փոխնախագահ
«Զանգեզուրի միջանցքը նույնպես պետք է կրի նախագահ Իլհամ Ալիևի անունը։ Այդ մասին հայտարարել է Միլլի Մեջլիսի առաջին փոխնախագահ Ալի Ահմեդովը խորհրդարանի արտահերթ նստաշրջանի շրջանակներում հատուկ նիստում, որը նվիրված է «Վաշինգտոնյան համաձայնագրեր․ խաղաղ դիվանագիտության և իմաստուն առաջնորդության հաղթանակը» թեմային:
Ալի Ախմեդովը նշել է, որ ստեղծվում է Ադրբեջանի նոր պատմություն. «Մենք բոլորս ականատես ենք նոր լուսավոր էջերի ստեղծմանը։ Ադրբեջանը և նախագահ Իլհամ Ալիևը չեն սահմանափակվում միայն Ադրբեջանի նոր պատմության ստեղծմամբ, այլև ստանձնել են տարածաշրջանի նոր պատմության ստեղծման առաքելությունը։
Ցանկացած պետության ուժը ցույց են տալիս երեք գործոն՝ տնտեսությունը, բանակը և դիվանագիտությունը։ Դիվանագիտության առաջընթացն ավելի շատ կախված է անհատից և առաջնորդությունից: Վաշինգտոնում ձեռք բերված Ադրբեջանի դիվանագիտական մեծ հաղթանակի հեղինակը նախագահ Իլհամ Ալիևն է:
Սա նաև նոր փուլ է Ադրբեջանի և Միացյալ Նահանգների հարաբերություններում, որը կհանգեցնի Ադրբեջանի միջազգային տնտեսական ինտեգրման հետագա ընդլայնմանը։ Այս հանդիպմանը ստացվել է «Զանգեզուրի միջանցքի» իրականացման միջազգային երաշխիք։
Ադրբեջանական դիվանագիտության ամենապայծառ գագաթնակետը Վաշինգտոնում կայացած բանակցություններն ու այնտեղ ձեռք բերված հաջողություններն են: Վաշինգտոնում դիվանագիտական մեծ հաղթանակի միակ հեղինակը նախագահ Իլհամ Ալիևն է։
«Զանգեզուրի միջանցքը» նոր պատմության շատ կարևոր նախագիծ կլինի։
Ինչպես Բաքու-Թբիլիսի-Ջեյհան խողովակաշարը կրում է համազգային առաջնորդ Հեյդար Ալիևի անունը, այնպես էլ «Զանգեզուրի միջանցքը» պետք է կրի նախագահ Իլհամ Ալիևի անունը»:
Ավելացնել նոր մեկնաբանություն