Ջրային աղետ Իրանում. նախատեսում են «փակել» մայրաքաղաքը
Իրանը բախվում է ջրի լուրջ պակասի, գետերն ու ջրամբարները չորանում են, իսկ մայրաքաղաք Թեհրանում ջրամատակարարման վիճակը հասնում է վտանգավոր մակարդակի․ գրում է Bild-ը։
Կառավարության խոսնակ Ֆաթեմեհ Մոհաջերանին ջրի պակասը անվանել է «ազգային խնդիր», որը կարող է վերածվել մարդասիրական և տնտեսական աղետի։
«Թեհրանում ջրային իրավիճակը շատ վատ է, ուստի մենք ստիպված ենք քննարկել մայրաքաղաքը մեկ շաբաթով փակելու հարցը», – ասել է նա։ «Փակելով» նա նկատի ունի պետական հաստատությունների, համալսարանների և դպրոցների աշխատանքի դադարեցումը։
Կառավարությունը քննարկում է խնդիրը լուծելու ոչ ավանդական տարբերակներ, այդ թվում՝ աշխատանքային շաբաթը չորս օրով կրճատելը և աշխատակիցներին հեռավար աշխատանքի ուղարկելը՝ ջուր և էլեկտրաէներգիա խնայելու համար։ Այս միջոցառումը նպատակ ունի կրճատել ռեսուրսների սպառումը ներկայիս ճգնաժամի պայմաններում։
Խնդիրը ազդել է գրեթե ամբողջ երկրի վրա, ջրամբարների 80%-ը համարյա դատարկ է։ Ակնկալվում է, որ նորմալ ջրամատակարարումն անհնար կլինի մինչև աշուն, երբ անձրևներ կտեղան։
Մեկ շաբաթ առաջ Թեհրանի և 50 այլ քաղաքների իշխանությունները սահմանափակումներ էին մտցրել ջրամատակարարման վրա՝ 12-ից 48 ժամ տևողությամբ անջատման ժամանակահատվածով։ Արդյունքում, շատ բնակիչներ տեղափոխվել էկն հյուսիս՝ դեպի Կասպից ծով, որտեղ դեռևս բավարար քանակությամբ ջուր կա։
Իրավիճակի լրջությունը հաստատել էր նախագահ Մասուդ Փեզեշքիանը, որը չբացառեց նույնիսկ մայրաքաղաքը մեկ այլ քաղաք տեղափոխելը. «Թեհրանում իսկապես այլևս ջուր չկա»։
Աղբյուրը` ABC MEDIA
Ավելացնել նոր մեկնաբանություն