Չինաստանը Թայվանի պատճառով պատժամիջոցներ է սահմանել ամերիկյան 2 կազմակերպության նկատմամբ

Ապրիլի 7-ից Չինաստանի համալսարաններին, հաստատություններին և այլ կազմակերպություններին ու անհատներին խստիվ արգելվում է գործարքներ, փոխանակումներ, համագործակցություն և այլ գործունեություն իրականացնել տվյալ կազմակերպությունների հետ: Կազմակերպությունների չորս ղեկավարներին արգելվում է մուտք գործել ՉԺՀ տարածք։

Չինաստանի իշխանությունները հայտարարել են, որ Հադսոնի ինստիտուտի (Hudson Institute) և Ռեյգանի գրադարանի (Reagan Library) նկատմամբ պատժամիջոցներ են սահմանել «Մեկ Չինաստանի» սկզբունքի խախտման պատճառով:

Ինչպես նշվում է Չինաստանի արտաքին քաղաքական գերատեսչության հայտարարության մեջ, հիշյալ կազմակերպություններն ԱՄՆ-ի տարածքում Թայվանի վարչակազմի ղեկավար Ցայ Ինվենին հարթակ են տրամադրել անջատողական գործունեությանը մասնակցելու համար՝ դրանով իսկ լրջորեն խախտելով «Մեկ Չինաստանի» սկզբունքը և չին-ամերիկյան երեք համատեղ կոմյունիկեի դրույթները: Ըստ ԱԳՆ-ի՝ այդ գործողությունները լուրջ վնաս են հասցրել Չինաստանի ինքնիշխանությանն ու տարածքային ամբողջականությանը։

«Մեկ Չինաստանի» սկզբունքը խախտելու համար պատժամիջոցներ են սահմանվել նաև թայվանական երկու կազմակերպության նկատմամբ։ Խոսքը «Prospect Foundation» և «Council of Asian Liberals and Democrats» կազմակերպությունների մասին է։

Բացի դրանից՝ Չինաստանի իշխանությունները պատժամիջոցներ են սահմանել ԱՄՆ-ում Թայվանի ներկայացուցչության ղեկավար Սյաո Մեյքինի նկատմամբ։

Աղբյուրը՝Sputnik