Իսրայելը Նիդեռլանդներին կմատակարարի PULS հրետանային հրթիռային համակարգեր

Իսրայելական «Elbit Systems» ընկերությունը հայտարարել է, որ 305 միլիոն դոլար արժողությամբ պայմանագիր է կնքել Նիդեռլանդների թագավորական բանակին PULS հրետանային հրթիռային համակարգեր մատակարարելու համար։

Ըստ ներկայացված տեղեկության՝ պայմանագիրը կյանքի է կոչվել Իսրայելի և Նիդեռլանդների պաշտպանության նախարարությունների միջև ռազմական համագործակցության շարունակականությանն աջակցող համաձայնագրի շրջանակում։

Պայմանագրի համաձայն՝ «Elbit Systems»-ը հինգ տարվա ընթացքում կմատակարարի 20 PULS միավոր համակարգ, որոնք տեղադրված են «Commit» բեռնատարների հարթակներում:

«Elbit Systems»-ի գործադիր տնօրեն և նախագահ Բեժալել Մաչլիսը համաձայնագրի վերաբերյալ հայտարարության մեջ ասել է. ««Elbit Systems»-ի PULS համակարգի  գնումը կբարձրացնի Նիդեռլանդների թագավորական բանակի կարողությունը կրակային աջակցություն տրամադրելու և ՆԱՏՕ-ի անդամների հետ փոխգործունակություն ապահովելու համար»։