ՄԱԿ-ը կրճատում է Հորդանանում գտնվող սիրիացի փախստականներին տրամադրվող դրամական օգնությունը ֆինանսավորման ճգնաժամի պատճառով

Հորդանանը 11 միլիոն բնակչություն ունեցող երկիր է և ընդունում է մոտ 1․3 միլիոն փախստական Սիրիայից, որոնց մեծ մասն ապրում է թագավորության ճամբարներում: Հորդանանի երկու խոշորագույն ճամբարում՝ Զաաթարիում և Ազրաքում, փախստականների գրեթե կեսն ապավինում է դրամական օգնությանը:

Հորդանանի պաշտոնյաները զգուշացրել են, որ թագավորությունը չի կարող լրացնել միջազգային դոնորների թողած բացը:

ՄԱԿ-ի գործակալությունները և միջազգային մարդասիրական կազմակերպությունները տարիներ շարունակ պայքարել են Սիրիայում և հարևան երկրներում սիրիացի փախստականների համար բյուջետային պահանջների հասնելու համար:

Թեև Սիրիայի նախագահ Բաշար Ասադի կառավարությունը դաշնակից Ռուսաստանի և Իրանի օգնությամբ կարողացավ հետ վերցնել իր տարածքների մեծ հատվածներ, պատերազմից տուժած երկրում ճգնաժամը շարունակում է մնալ փակուղում:

Ֆինանսական կրճատումներն ազդել են նաև միլիոնավոր սիրիացի փախստականների վրա Լիբանանում և Թուրքիայում, որտեղ փախստականների դեմ հռետորաբանությունը և զանգվածային տեղահանությունների կոչերը մեծացել են տնտեսական և քաղաքական ցնցումների լույսի ներքո:

Հորդանանի արտաքին գործերի նախարար Այման Սաֆադին անցյալ հունիսին Բրյուսելում Սիրիայի հարցով այս տարվա ամենամյա դոնորների համաժողովում խոսել է թագավորության անկարողության մասին՝ լրացնելու ֆինանսավորման բացերը: Անցյալ շաբաթ նա կրկին զգուշացրել է, որ «փախստականները կտուժեն»։

«Սա Հորդանանի վրա չէ: Սա նրանց վրա է, ովքեր կրճատում են աջակցությունը,- ասել է նա:- Փախստականներին արժանապատիվ կյանքով ապահովելը համաշխարհային պատասխանատվություն է: Դա միայն մերը չէ՝ որպես ընդունող երկիր»։

Հորդանանում ՄԱԿ-ի փախստականների գործակալության ներկայացուցիչ Դոմինիկ Բարտշը նշել է, որ օգնության հետաձգումը ստիպել է գործակալություններին աջակցել միայն առավել խոցելի ընտանիքներին՝ շատերին թողնելով առանց օգնության:

«Կա անմիջական վտանգ, որ իրավիճակը կվերածվի հումանիտար ճգնաժամի, որը լուրջ հետևանքներ կունենա փախստականների և ընդունող համայնքների համար»,- ասել է Բարտշը:

Հուլիսի 4-ին Դամասկոս կատարած այցի ժամանակ Սաֆադին, հանդիպելով Ասադին, կոչ է արել ներդրումներ կատարել Սիրիայի վնասված ենթակառուցվածքներում՝ արագացնելու փախստականների կամավոր վերադարձը: Հորդանանը նաև գլխավորել է Դամասկոսի հետ տարածաշրջանային բանակցությունները՝ հակամարտությանը վերջ տալու համար լուծում գտնելու նպատակով:

Արևմտյան երկրները դեռևս պատժամիջոցներ են սահմանում Սիրիայի դեմ, այդ թվում՝ ենթադրյալ ռազմական հանցագործությունների և թմրանյութերի առևտրի մեջ ներգրավվելու համար, և հավանություն չեն տվել Ասադի հետ կապերի վերականգնմանը կամ վերակառուցման ֆինանսավորմանը, ինչպես արաբական երկրներն են արել: