Կիրառվելու են Արցախում փորձարկված նույն եղանակները՝ շրջափակում, տնետեսական և ռազմական ճնշում. պատմաբան

Ռազմական պատմաբան Արմեն Այվազյանը ֆեյսբուքյան իր էջում գրում է. «Փաշինյանն ասում է, թե Տավուշի 4 գյուղերը եթե հանձնենք ու կանգնենք ՀՀ «միջազգայնորեն ճանաչված» ծռմռված սահմանների վրա, ապա Ադրբեջանին ավելի հաջող կզսպենք, որովհետև կունենանք «լեգիտիմ» սահմաններ։ 

Լավ, սա ո՞ւմ է ավանակի տեղ դրել։ Ցեղասպան Ադրբեջանի ցեղասպան ծնողը՝ Թուրքիան խախտել և զավթել է երեք պետության՝ Կիպրոսի, Սիրիայի և Իրաքի սահմանազատված ու սահմանագծված «լեգիտիմ» տարածքից տասնյակ հազարավոր կիլոմետրեր՝ առանց երբևէ միջազգային լուրջ ճնշման ենթարկվելու։ Մի՞թե այս մասին չգիտեն ՀՀ վերին օղակներում հայտնված «գործիչները»։ Միայն Կիպրոսում թուրքական բանակն արդեն ուղիղ 50 տարի գրավված է պահում 3355 կմ²։

Փաշինյանը նաև պարզ հայտարարում է, որ Ադրբեջանը չի էլ պատրաստվում նահանջել իր գրաված ՀՀ մոտ 200 կմ² տարածքներից։ Ուրեմն Ադրբեջանին 4 գյուղ նվիրելով և այդպիսով վտանգելով ՀՀ ամբողջ հյուսիս-արևելքը՝ ո՞ւմ համար, ո՞ւմ օգտին և ի՞նչ հարց է փորձում լուծել ՀՀ ներկայիս ոչ բարով վարչապետը։ Պարզ է, որ Հայաստանի և հայ ժողովրդի համար ո՛չ մի հարց էլ չի լուծվելու։ Բայց ահա Ադրբեջանը, ճեղքելով նաև մեր հյուսիս-արևելյան պաշտպանական գոտին և վերահսկողություն հաստատելով միջպետական ճանապարհների ու գազատարի վրա, կկարողանա շատ ավելի մեծ թափով ու արագությամբ շարունակել Հայաստանի հայաթափումը։ Կիրառվելու են Արցախում փորձարկված նույն եղանակները՝ շրջափակում, տնետեսական և ռազմական ճնշում, ներթափանցումներ Հայաստանի խորքերը, իսկ վերջում՝ ամբողջական ներխուժում։

Փաշինյանը և նրան սատարող քաղաքական թիմը ՀՀ ազգային անվտանգության թիվ մեկ թշնամին են։ Կասկածողներ կա՞ն»։