Որ դեպքում ուժի մեջ կմտնի Հայաստանի և Ադրբեջանի սահմանազատման հանձնաժողովների գործունեության կանոնակարգը. պարզաբանում է Ալեն Սիմոնյանը

Ազգային ժողովի նախագահ Ալեն Սիմոնյանը անդրադարձել է այն հարցին, թե արդյոք Ադրբեջանում գործընթացներ ընթանում են Հայաստանի և Ադրբեջանի սահմանազատման հանձնաժողովների կանոնակարգի վավերացման հետ կապված։

«Մենք խորհրդարանական երկիր ենք, Ադրբեջանը նախագահական երկիր է։ Եվ, վերջիվերջո, այս կանոնակարգը, որը ընդունվում է, ուժի մեջ է մտնում այն ժամանակ, երբ երկու կողմերը փոխանակվում են արձանագրություններով, որ գործընթացն ավարտված է։ Այսինքն՝ եթե այնպես է ստացվում, որ Ադրբեջանը չի վավերացնում կանոնակարգը, մեր արած գործընթացը որևէ իրավական ուժ չի ստանում։ Դա պայման է։ Եվ, վերջիվերջո, մենք բոլոր կետերը համաձայնեցրել ենք։ Մեր կողմից կանոնակարգի վավերացումը իրավական առումով որևիցե ռիսկ չի պարունակում, քանի որ դա իրավական ուժ չի ստանում, մինչև արձանագրություններով չփոխանակվենք, որ գործընթացն ավարտված է»,- լրագրողների հետ զրույցում ասել է Սիմոնյանը։

Հարցին՝ հավաստիացումներ եղե՞լ են, որ ՀՀ տարածքից ադրբեջանական ԶՈւ-երը դուրս են գալու, նա պատասխանել է. «Մենք չենք քննարկել այդ մանրուքը, մենք քննարկել ենք, որ սկզբունքներ ենք սահմանում, որի հետևանքով իրենք էլ պետք է դուրս գան, մենք էլ պետք է դուրս գանք այն վայրերից, որտեղ մենք ենք առաջ»:

Ալեն Սիմոնյանը հայտարարել է, որ այս պահին ինչ քննարկում են Ադրբեջանի հետ դա վերջնական փաստաթուղթ է, որը համաձայնեցված է նրանց հետ:

Հայաստանի խորհրդարանը քննարկում է Հայաստանի և Ադրբեջանի սահմանազատման հանձնաժողովների գործունեության կանոնակարգը վավերացնելու հարցը։ ԱԺ ընդդիմադիր «Հայաստան» և «Պատիվ ունեմ» խմբակցությունները քննարկումից առաջ հայտարարեցին, որ չեմ մասնակցելու կանոնակարգը վավերացնելու հարցի քննարկմանն ու քվեարկությանը։ Ընդդիմադիր պատգամավորները մտահոգություն հայտնեցին, որ Ադրբեջանը կարող է ընդհանրապես հրաժարվել կանոնակարգը վավերացնելուց, ուստի, խնդրահարույց համարեցին, որ Հայաստանը պատրաստվում է վավերացնել այն։