Սաուդյան Արաբիան հայտնել է հութիների հարձակման հետևանքով 11 քաղաքացիական անձի վիրավորվելու մասին
Սաուդյան Արաբիայի Նաջրանի նահանգում օգոստոսի 6-ին հութիների հարձակումների հետևանքով տասնմեկ քաղաքացիական անձ է վիրավորվել։ «Արմենպրես»-ի փոխանցմամբ՝ այս մասին օգոստոսի 7-ին X միկրոբլոգում հայտնել է Եմենում Սաուդյան Արաբիայի գլխավորած միջազգային կոալիցիայի խոսնակ Թուրքի ալ-Մալիքին։
Նրա խոսքով՝ վիրավորվել է Սաուդյան Արաբիայի յոթ քաղաքացի, այդ թվում՝ մեկ կին և չորս տարեկան երեխա, ինչպես նաև վիրավորվել է մեկ եմենցի, Եգիպտոսի 2 քաղաքացի և մեկ պակիստանցի։
Ալ-Մալիքին հայտարարել է, որ հութիները թիրախավորել են քաղաքացիական օբյեկտները, ինչը միջազգային մարդասիրական իրավունքի կոպիտ խախտում է։Նա հավելել է, որ կոալիցիան կշարունակի կանխել նման հարձակումները՝ քաղաքացիական բնակչության պաշտպանությունն ապահովելու համար։
Վերջին օրերին Եմենի «Անսար Ալլահ» շարժման հութիները պատասխանատվություն են ստանձնել Սաուդյան Արաբիայի թիրախների վրա մի քանի հարձակման համար։
Հութիները պնդում են, որ գործողություններն իրականացվել են՝ ի պատասխան Սաուդյան Արաբիայի կողմից «Անսար Ալլահ»-ի վերահսկողության տակ գտնվող տարածքների շրջափակման։
Եմենն ավելի քան մեկ տասնամյակ բախվում է քաղաքացիական պատերազմի. հութիները գրավել են մայրաքաղաք Սանան և ստիպել միջազգայնորեն ճանաչված կառավարությանը տեղափոխվել հարավ։ Ադենի հարավային նավահանգստից գործող կառավարությունը վայելում է Սաուդյան Արաբիայի և Պարսից ծոցի այլ պետությունների աջակցությունը։
Ավելացնել նոր մեկնաբանություն