Սիրիայում իսրայելական ավիահարվածը 10 մարդու կյանք է խլել

Սիրիայում իսրայելական ավիահարվածի հետևանքով 10 մարդ է զոհվել։ Այս մասին հաղորդում է Syria TV-ն։ Իսրայելական ուժերը թիրախավորել են Դարաայի շրջանի Նավա քաղաքը։

Սիրիական SANA գործակալության տվյալներով՝ զոհվել է 9 մարդ։

Տեղեկություններ են հաղորդվել, որ զոհերը գրանցվել են իսրայելական ուժերի դեմ պայքարում, որոնք, ի վերջո, նահանջել են ժամեր շարունակ Նավա քաղաքի և Ալ-Ջուբեյլիա գյուղաքաղաքի տարածքում մնալուց հետո։

Ապրիլի 2-ի երեկոյան Syria TV-ի թղթակիցը հայտնել էր, որ իսրայելական ուժերը տասնյակ ռազմական մեքենաներ են տեղակայել և ներխուժել Դարաայի շրջանի Նավա քաղաքի շրջակայք:

Սիրիայի հարավ ներխուժմանը զուգահեռ՝ իսրայելական ռազմական ինքնաթիռները ապրիլի 2-ի երեկոյան 14 հաջորդական ավիահարվածներ են հասցրել Սիրիայի հինգ տարբեր շրջանների, այդ թվում՝ մայրաքաղաք Դամասկոսի հյուսիսում գտնվող Մասաքեն Բարզե թաղամասի գիտահետազոտական շենքին և Համայի նահանգի ռազմական օբյեկտներին, ինչի հետևանքով գրեթե ամբողջությամբ ավերվել է Համայի ռազմական օդանավակայանը, վիրավորվել են տասնյակ խաղաղ բնակիչներ և զինվորներ:

Հարձակումներին զուգահեռ, իսրայելցի պաշտոնյան, որի անունը չի նշվում, Jerusalem Post-ին ասել է, որ Սիրիայի տարածքում Իսրայելի ինչպես հայտարարված, այնպես էլ չհայտարարված ավիահարվածները նպատակ ունեն հստակ ուղերձ հղել Անկարային. «Սիրիայում թուրքական ռազմաբազաներ մի՛ հիմնեք և մի՛ միջամտեք Սիրիայում Իսրայելի օդային գործողություններին»։

Իսրայելական աղբյուրների համաձայն՝ իսրայելական կողմը մտահոգված է Սիրիայում Թուրքիայի աճող դերի առնչությամբ։

«Թուրքիան մարտահրավեր է ներկայացնում: Նա Իրան չէ, սակայն ներկայումս ձգտում է իմպերիալիստական էքսպանսիայի, մարզում ու զինում է սիրիական բանակը և փորձում է ամրապնդել իր ռազմական ներկայությունը Սիրիայի ներսում գտնվող բազաների միջոցով», – ասել են աղբյուրները:

Իսրայելի պաշտպանության նախարար Իսրայել Կացն իր հերթին ընդգծել է, որ «Սիրիայում Իսրայելի նպատակն է ապառազմականացնել երկրի հարավը և ապահովել սիրիական տարածքում վտանգից զերծ մթնոլորտ»:չ