Թեհրանը երաշխիքներ է ստացել՝ Հարավային Կովկասում երրորդ երկրների ուժեր չեն տեղակայվի. Բաղայի
Իրանը մշտապես ընդգծել է իր զգայուն վերաբերմունքը Հարավային Կովկասում արտատարածաշրջանային դերակատարների ներկայության և միջամտության հանդեպ. այս մասին, Tasnim-ի փոխանցմամբ, ասել է Իրանի ԱԳՆ խոսնակ Էսմայիլ Բաղային:
«ԱՄՆ ընկերությունների հետ նախատեսվող համագործակցությունները տեղի են ունենալու բացառապես Հայաստանում գրանցված ընկերության միջոցով և այդ երկրի ներքին օրենքներին համապատասխան։ Երկու երկրների համատեղ հայտարարության մեջ ևս շեշտվել է ազգային ինքնիշխանության, տարածքային ամբողջականության և սահմանների անխախտելիության պահպանումը», - ասել է Բաղային:
Նա ընդգծել է, որ տրանսպորտային և հաղորդակցական ուղիների ապաշրջափակումը և ստեղծումը, այդ թվում՝ Հայաստանի հարավով անցնող երկաթուղային գիծը, որը կապելու է Ադրբեջանը Նախիջևանի ինքնավար հանրապետության հետ, չպետք է վնասի միջազգային մակարդակով ճանաչված սահմաններին, հակասի Հայաստանի ինքնիշխանությանը կամ հանգեցնի տարածաշրջանի աշխարհաքաղաքականության փոփոխությանը։
«Իրանն ուշադիր հետևում է իրավիճակին և անհրաժեշտության դեպքում իր մտահոգությունները կհայտնի տարածաշրջանի երկրներին՝ կանխելու համար ցանկացած արտատարածաշրջանային միջամտություն, որը կարող է վնաս հասցնել Հարավային Կովկասի խաղաղությանը, կայունությանը և անվտանգությանը», - ասել է Բաղային:
Նա հավելել է` Թեհրանը երաշխիքներ է ստացել, որ Հայաստանի և Ադրբեջանի միջև խաղաղության համաձայնագրի կնքումից հետո Հարավային Կովկասի տարածաշրջանում երրորդ երկրների ուժեր չեն տեղակայվի։
Ավելացնել նոր մեկնաբանություն