Ժնևը մերժել է Ադրբեջանի դեմ ներկայացված բանաձևի նախագիծը՝ Արցախի բռնազավթման և քաղբանտարկյալների ազատ արձակման վերաբերյալ

2024 թվականի նոյեմբերի 5-ին Ժնևի կանտոնի խորհրդարանի մի շարք հայամետ պատգամավորների կողմից ներկայացված «Լեռնային Ղարաբաղի անեքսիա և Ադրբեջանի քաղբանտարկյալների ազատ արձակում» վերնագրով թիվ 24.321 որոշման նախագիծը 2025 թվականի օգոստոսի 11-ին մերժվեց Շվեյցարիայի խորհրդարանի վերին պալատի՝ Կանտոնների խորհրդի արտաքին հարաբերությունների հանձնաժողովի կողմից։

Ըստ «Դետքի»՝ այս մասին APA-ին հայտնել են դեսպանատնից։

Նշվում է, որ բացի դրանից՝ օրակարգից հանվել է նաև խորհրդարանական հանձնաժողովի անդամ Կառլո Սոմարուգայի առաջարկած նոր բանաձևի նախագիծը, որը վերաբերում է բացառապես գերիներին և հայկական մշակութային ժառանգության պահպանմանը. նախագիծը մերժվել է 5 «դեմ», 4 «կողմ» և 3 «ձեռնպահ» ձայների հարաբերակցությամբ։

Ըստ APA-ի՝ Շվեյցարիայի խորհրդարանի վերին պալատի արտաքին հարաբերությունների հանձնաժողովի մամուլի հաղորդագրության մեջ ընդգծվում է, որ խորհրդարանի նախաձեռնությունը միակողմանի է և պարունակում է պահանջներ բացառապես ադրբեջանական կողմին, և այս մոտեցման կապակցությամբ բողոք է արտահայտվել։