ԱՄՆ-ն ծովային անօդաչու սարքերի նավատորմ է ստեղծում Չինաստանին հակազդելու համար. Reuters

 Պենտագոնը մշակում է անօդաչու ծովային սարքերի նավատորմ՝ Չինաստանի հետ զինված հակամարտության դեպքում։ Այս մասին հայտնել է Reuters-ը։

Գործակալության տվյալներով՝ նախատիպերը փորձարկվել են Խաղաղ օվկիանոսում՝ Կալիֆոռնիայի ափերի մոտ։ Փորձարկումների ժամանակ նավերից մեկը հանկարծակի կանգ է առել և շեղվել է ծրագրային սխալի պատճառով, իսկ մեկ այլ անօդաչու մակերևութային նավակ մեծ արագությամբ բախվել է դրան և թռել տախտակամածի վրայով։ Անօդաչու մակերևութային նավերը մշակվում են Saronic-ի և BlackSea Technologies-ի կողմից։

Գործակալությունը նշում է, որ մի քանի շաբաթ առաջ՝ BlackSea-ի մեկ այլ նախատիպի փորձարկումների ժամանակ, անօդաչու նավը անսպասելիորեն միացրել է շարժիչները և շրջել այն քարշ տվող օժանդակ նավը։ Reuters-ի աղբյուրը նշել է, որ երկու դեպքում էլ միջադեպերը առաջացել են ծրագրային սխալների և մարդկային սխալի պատճառով։

Գործակալության տվյալներով՝ Պենտագոնը մտադիր է մշակել և շահագործման հանձնել ծովային և օդային անօդաչու թռչող սարքերի խմբեր՝ Թայվանի դեմ հնարավոր չինական ռազմական գործողությունը խափանելու համար։ Ինչպես նշում է Reuters-ը, Ուկրաինայի կողմից մշակված և Սև ծովում օգտագործվող անօդաչու մոտորանավակների արժեքը կազմում է մոտ 250,000 դոլար, սակայն ԱՄՆ ռազմածովային ուժերը ցանկանում են ստանալ նման զենքի ավելի բարձր տեխնոլոգիական տարբերակ. ամերիկյան զինվորականները ցանկանում են զինված լինել անօդաչու նավակների խմբերով, որոնք ինքնուրույն կգործեն բաց ծովում: Յուրաքանչյուր նման նավի արժեքը կկազմի մի քանի միլիոն դոլար։

Գործակալության աղբյուրների համաձայն, այս ծրագրերը բախվում են նաև այլ խնդիրների. Պենտագոնի ղեկավարությունը վերջերս աշխատանքից ազատել է ծովային անօդաչու սարքերի գնման ծրագրի պատասխանատու ծովակալին: Բացի այդ, Reuters-ի երկու աղբյուրներ նշել են, որ ռազմական գերատեսչությունը միակողմանիորեն կասեցրել է L3Harris-ի հետ կնքված 20 միլիոն դոլարի պայմանագիրը, որը մշակում էր անօդաչու նավերի համար ծրագրային ապահովում։

Reuters-ը նշում է, որ ԱՄՆ ռազմածովային ուժերը արդեն իսկ BlackSea-ի հետ կնքել են 160 միլիոն դոլարի պայմանագրեր. ընկերությունն այժմ ամսական մի քանի տասնյակ հետախուզական ծովային անօդաչու սարքեր է արտադրում ԱՄՆ ռազմածովային ուժերի համար: Saronic-ը մշակել է Corsair անօդաչու նավի սեփական նախագիծը, բայց դեռևս չի ստորագրել դրա գնման պայմանագիր Պենտագոնից։ Միաժամանակ, ընկերությունը ռազմական գերատեսչությունից արդեն ստացել է 20 միլիոն դոլար՝ նախատիպեր մշակելու համար։