ԱՄՆ-ն մինչև այս տարվա վերջ կստեղծի առաջին աշխատանքային խմբերը Ադրբեջանի և Հայաստանի հետ
ԱՄՆ կառավարությունը նախատեսում է մինչև այս տարվա վերջ ստեղծել առաջին աշխատանքային խմբերը Ադրբեջանի և Հայաստանի հետ։ Այս մասին հայտնում է Report-ը՝ հղում անելով ԱՄՆ պետդեպին։
Նշվում է, որ ԱՄՆ կառավարությունը շարունակում է խորացնել համագործակցությունը Ադրբեջանի և Հայաստանի հետ՝ հիմնվելով ձեռք բերված պայմանավորվածությունների վրա. «Միացյալ Նահանգները հանձնառու է իրականացնել օգոստոսի 8-ին Վաշինգտոնում ստորագրված պատմական համատեղ հռչակագրերն ու փոխըմբռնման հուշագրերը և կապահովի երկու կառավարությունների հետ առաջին աշխատանքային խմբերի ստեղծումը մինչև տարեվերջ»,- ասված է հաղորդագրության մեջ։
Պետդեպարտամենտը նաև ողջունել է Ադրբեջանի և Հայաստանի միջև ընթացող երկխոսությունը և վերջին շրջանում ձեռնարկված գործնական քայլերը։ Նշվում է, որ ԱՄՆ կառավարությունը ուշադիր հետևում է Ադրբեջանի և Հայաստանի ներկայացուցիչների միջև հանդիպումներին և ձեռք բերված պայմանավորվածությունների իրականացմանը. «Մենք ողջունում ենք Ադրբեջանի և Հայաստանի ներկայացուցիչների միջև վերջերս տեղի ունեցած բովանդակալից քննարկումները սահմանների սահմանազատման, ականազերծման և TRIPP նախագծի աջակցության համար ենթակառուցվածքների զարգացման վերաբերյալ:
Մենք նաև ողջունում ենք Ադրբեջանի վերջին որոշումը՝ թույլատրել բեռների տարանցումը իր տարածքով դեպի Հայաստան, ինչպես նաև երկու երկրների քաղաքացիական հասարակության ներկայացուցիչների հանդիպումը Երևանում:
ԱՄՆ գլխավորած նախաձեռնությունները, զուգորդված այս ջանքերի հետ, կգրավեն մասնավոր ներդրումներ և կբերեն բարգավաճման նոր դարաշրջան Ադրբեջանի, Հայաստանի և այլ երկրների համար»,- նշվում թ հայտարարության մեջ:
Ավելացնել նոր մեկնաբանություն