Արցախում Ադրբեջանի կողմից ցեղասպանության գործով նախաքննությունը շարունակվում է. ՔԿ
Ադրբեջանի կողմից Լեռնային Ղարաբաղի բնակչության նկատմամբ իրականացված ցեղասպանության գործով նախաքննությունը շարունակվում է, Sputnik Արմենիայի գրավոր հարցմանն ի պատասխան հայտնում է ՀՀ քննչական կոմիտեն։
ՀՀ քննչական կոմիտեում քրեական վարույթ է նախաձեռնվել 2023 թվականի սեպտեմբերի 20-ին` ադրբեջանական ագրեսիայից հետո․«Քրեական վարույթն իրականացվել է շրջափակման մեջ պահվող Լեռնային Ղարաբաղի խաղաղ բնակչությանն իրենց ազգային, էթնիկ, ռասայական, կրոնական պատկանելության շարժառիթով լրիվ կամ մասնակի ֆիզիկական ոչնչացման, առողջությանը ծանր վնաս պատճառելու, դրան ուղղված կյանքի պայմաններ ստեղծելու վերաբերյալ զանգվածային լրատվության միջոցներում հրապարակված տեղեկությունների առթիվ ՀՀ քննչական կոմիտեում ՀՀ քրեական օրենսգրքի 133-րդ հոդվածի 1-ին մասով` ցեղասպանություն, նախաձեռնվել են քրեական վարույթներ»։
Մասնավորապես, խոսքը վերաբերում է Լաչինի միջանցքի փակմանը, Լեռնային Ղարաբաղի շրջափակմանը, դրանով մարդասիրական և ուղևորափոխադրումների անհնարինությանը, գազի և էլեկտրամատակարարման դադարեցմանը, ինչպես նաև սեպտեմբերի 19-ին Ադրբեջանի սանձազերծած հերթական ագրեսիային, որն ունի էթնիկ զտման ու ցեղասպանության նպատակ։
Քննչական կոմիտեից այլ մանրամասներ չեն հայտնել։
Ավելացնել նոր մեկնաբանություն