Բրյուսելում Փաշինյան-Ալիև հանդիպում նախատեսված չէ․ Վահան Կոստանյան
ՀՀ վարչապետ Նիկոլ Փաշինյանի՝ Բելգիա կատարած աշխատանքային այցի ընթացքում Ադրբեջանի նախագահ Իլհամ Ալիևի հետ հանդիպում նախատեսված չէ: Այս մասին լրագրողների հետ զրույցում ասել է ՀՀ արտաքին գործերի նախարարի տեղակալ Վահան Կոստանյանը:
««Համաշխարհային դարպասներ»-ը ԵՄ լոգիստիկ, էներգետիկ ամենամեծ պրոյեկտներից մեկն է, որը պետք է կապի ԵՄ-ն տարբեր այլ տարածաշրջանների, այդ թվում՝ մեր տարածաշրջանի և Կենտրոնական Ասիայի տարածաշրջանների հետ: Եվ վարչապետը հրավիրված է ելույթ ունենալ այս ֆորումի բացման արարողության ժամանակ: Նաև նախատեսված են հանդիպումներ եվրոպացի գործընկերների հետ, երկկողմ այլ հանդիպումներ ևս տեղի կունենան: Եթե իմ տեղեկությունները ճիշտ են, Ադրբեջանի նախագահն այս միջոցառմանը չի մասնակցում»,- ասել է Կոստանյանը:
Հիշեցնենք՝ Փաշինյանը հոկտեմբերի 8-ին և 9-ին աշխատանքային այցով կգտնվի Բելգիայի Թագավորությունում՝ Բրյուսելում։ Վարչապետը կմասնակցի «Համաշխարհային դարպասներ» (Global Gateway) միջազգային երկրորդ համաժողովին։
Ավելացնել նոր մեկնաբանություն