Դուք հայտարարում եք, թե Արցախի հարց այլևս գոյություն չունի, բայց ո՞վ տվեց ձեզ այդ իրավունքը
Արցախի Արդարություն կուսակցության համանախագահ Հակոբ Հակոբյանը գրում է․
Այս երկրի վարչապետը ասում է` «Եթե ժողովուրդը համաձայն չէ Արցախի հարցում իմ դիքորոշմանը, թող դուրս գա, հեղափոխություն անի»։ Բայց երբ արցախցին բարձրաձայնում է իր ցավը, դուք նրանց ձերբակալում եք։ Դավիթ Գալստյանը՝ Արցախի Ազգային ժողովի պատգամավոր, «Արդարություն» խմբակցության ղեկավարն այսօր, մեկ ամսից ավելի անազատության մեջ է միայն նրա համար, որ խոսել է Արցախի հարցից։
Վերաքննիչդատարանը մերժում է բողոքը, իշխանությունը լռեցնում է։ Սա՞ է ձեր պատկերացրած ժողովրդավարությունը։ Սա՞ է ձեր խոստացած նոր Հայաստանը։ Դուք հայտարարում եք, թե Արցախի հարց այլևս գոյություն չունի։ Բայց ո՞վ տվեց ձեզ այդ իրավունքը։
Ո՞վ ձեզ լիազորեց մեր պատմությունը փակել։ Արցախի հարցը չի վերանում, քանի դեռ մեր հողում մեր հերոսների արյունն է, ու մեր ժողովրդի կամքը՝ չմոռանալ, չնվազել, չհրաժարվել։ Ձեր խոսքերն ու գործերը կոպտորեն հակասում են միմյանց։ Մի կողմից՝ դուք կոչ եք անում խոսել, պայքարել, իբր «ազատ և հպարտ քաղաքացի» արտահայտվել։
Մյուս կողմից՝ հենց մարդիկ դա անում են՝ դուք կալանավորում եք։ Սա այլևս ժողովրդավարություն չէ, սա սառը քաղաքական հաշվեհարդար է։ Սա լռեցում է, սա ուրացում է ազգային հիշողության, զոհերի, մեր իղձերի։ Արցախը չի մոռացվում։ Արցախը չի փակվում դատարաններով ու բանտարկություններով։ Արցախի հարցը ձեր քաղաքական որոշումներով չի ոչնչանում։ Այս ժողովուրդը երբեք չի ընդունելու պարտված ու նվաստացած մանիպուլյացիա։
Պատմությունը տեսնում է ամեն ինչ։ Եվ պատմության առաջ պատասխան եք տալու բոլորդ։ Ազատություն Դավիթ Գալստյանին, ազատություն բոլոր քաղբանտարկյալներին:
Ավելացնել նոր մեկնաբանություն