Երգչուհի Ջուլիանան Եռատոնի օրը լուսանկար է հրապարակել ադրբեջանցի երգչի հետ. Հասմիկ Պապյանի դատապարտող գրառումը
ՀՀ ժողովրդական արտիստ, օպերային երգչուհի Հասմիկ Պապյանը դիմել է օպերային սոպրանո Ջուլիանա Գրիգորյանին, որը մայիսի 9-ին գրել է «Մուսկատ» թագավորական օպերայում տեղի ունեցած «Տրավիատա» ներկայացման առաջնախաղի մասին, որտեղ նրա զուգընկերն էր ադրբեջանցի տենոր Յուսիֆ Էյվազովը։
«Սիրելի Ջուլիանա, ավելորդ է ասել, թե հայ ժողովուրդը, այդ թվում նաև ես, որքան հպարտ ենք քո շարունակական հաջողություններով։ Երեք շաբաթ շարունակ քո էջում տեղադրում ես «Մուսկատ» թագավորական օպերայում տեղի ունեցած «Տրավիատա» ներկայացման առաջնախաղի մասին, որտեղ քո զուգընկերն էր «հարևան» երկրի հայտնի տենորը։ Իհարկե խնդիր չկա, կարող ես նրան սիրել, հավանել որպես երգիչ, հիանալ, անվանել «ֆանտաստիկ»։
Ամեն դեպքում, Մայիսի 9-ին՝ ոչ վաղ անցյալում մեր փառապանծ Եռատոնի Օրը, ԿԱՐՈՂ ԷԻՐ ՄԵԶ ԽՆԱՅԵԼ… Տեղեկացնեմ քեզ, որ 2020-ի դեկտեմբերին քո սիրելի խաղընկերը, մշակույթի նախարարի հետ միասին առաջինը երգեց Շուշիում, որպես հայերին հաղթած ժողովրդի արժանավոր զավակ։ Նաև ուզում եմ հիշեցնել, որ 2020-ի հունվարին (44-օրյա պատերազմից առաջ) նա Դրեզդենում հրաժարվեց զուգերգ կատարել հայազգի Ռուզան Մանթաշյանի հետ, միայն վերջինիս ազգային պատկանելության պատճառով։ Իհարկե գերմանացիները նրան «դարձի բերեցին», և Ռուզանը վերադարձավ ու միայնակ երգեց «Օպերային պարահանդեսին»։ Հետաքրքիր է իմանալ, արդյո՞ք քո խաղընկերը միևնույն ջանասիրությամբ և հրճվանքով իր էջերում լուսաբանում է հայ երգչուհու հետ ունեցած իր ելույթների մասին։ Վստահ չեմ… Կարիերան, հաջողությունները կանցնեն, կգնան, հայ լինելը և հայ մնալը՝ ոչ»,- գրել է Պապյանը։
Նշենք, որ Ջուլիանա Գրիգորյանը սոցիալական ցանցում հատուկ շնորհակալություն էր հայտնել ադրբեջանցի երգչին. «Ես նաև անչափ երախտապարտ եմ ամբողջ դերասանական կազմին, որը շարունակեց աջակցել ինձ ամբողջ ընթացքում: Հատկապես իմ առաջին ֆանտաստիկ Ալֆրեդո` Յուսիֆ Էյվազովին»։
Ավելացնել նոր մեկնաբանություն