ԳՇ պետն ագրեսիվ էր ու ոչ մի բանից տեղյակ չէր, դիմացը 266 անհետ կորածի անուն էր դրված. մանրամասներ
44-օրյա պատերազմում անհայտ կորած զինծառայողների ծնողների ու հարազատների՝ շուրջ 6 ժամ տևած բողոքի ակցիան ՊՆ շենքի առջև երեկ ավարատվել է ԳՇ պետի հետ հանդիպմամբ։
24News-ի հետ զրույցում անհայտ կորած զինծառայողներից մեկի հարազատը՝ Արսեն Ղուկասյանը, ասաց, որ բավականին երկար տևեց հանդիպումը, ու Էդվարդ Ասրյանը բոլոր ծնողների հետ է հանդիպել, չնայած, որ ՊՆ-ի կողմից ներկայացվել էր՝ թե 10 հոգու կարող է ընդունել։ «Մի եզրահանգման եկանք, որ ԳՇ պետը ոչ մի բանից տեղյակ չէ, ինչ ասեցինք, ասաց՝ տեղյակ չեմ, տենց չի լինի։ Հարցրել էլ եմ՝ ինչու՞ ադրբեջանցի զինվոր չեք գերեվարել, երբ ունեցել եք դրա հնարավորությունը, ասում ա․ «Քաղաքական հարց ես տալիս, ես չեմ կարող հիմա դնել-վերցնել», – 24News-ի հետ զրույցում մանրամասնեց Արսեն Ղուկասյանը։
Ղուկասյանի խոսքով, ԳՇ պետ էդվարդ Ասրյանը շատ հարցերի խուսափողական պատասխաններ է տվել։ Անգամ մի պահ մթնոլորտը լարվել է ԳՇ պետի հետ խոսակցության ժամանակ․
«Ծնողներից մեկն իր խոսքի մեջ մի փոքր ագրեսիվ էր, իր կողմից արձագանք եղավ, որ ես էլ կարող եմ ագրեսիվ խոսել։ Մենք էլ բացատրեցինք, որ դու չես կարող ագրեսիվ խոսել։ Հերիք չի՝ էս երկու օրվա կինոն սարքեցին մեր գլխին, որ կարող էին շատ հանգիստ ընդունել, մի հատ էլ ասաց, որ ամսի 27-ին մինչև 15։30 եղել է Գլխավոր շտաբում։ Շաբաթ օրը չընդունեց, երեկ մինչև իրիկուն ձգեցին»,- ասաց Ղուկասյանը։
Ըստ անհայտ կորածի զինծառայողի հարազատի՝ ԳՇ պետը հանդիպման ժամանակ ասել է, թե տեղյակ չի եղել, որ իր հետ հանդիպում են պահանջել ծնողները։
Ի վերջո ժամեր տևած հանդիպման արդյունքում անհայտ կորած զինծառայողների ծնողներն ու ԳՇ պետը պայմանավորվածություն են ձեռք բերել, որ ժամանակ առ ժամանակ՝ 7 օրը մեկ, 10 օրը մեկ, հանդիպումներ կունենան․ «Կլինի առանձին, թե խմբով, ամեն մեկի խնդրին անհատական մոտեցում կտա և խոստացավ, որ իր բոլոր հնարավորությունները կօգտագործի, որ էս հարցին տեսնի՝ ինչ տեսակի լուծում կարող է տրվել»,- հայտնեց Ղուկասյանը։
Արսեն Ղուկասյանը նաև նշեց, որ իր համար տարօրինակ բան է նկատել․ «ԳՇ պետի դիմաց թուղթ կար դրված, որտեղ անհայտ կորածների թիվը նշված էր 266, այնինչ, մենք մինչև այս պահը գիտենք 191-ի մասին»։
Ավելացնել նոր մեկնաբանություն