Հայ քաղհասարակության անդամները Ալիևի օգնականի հետ խոսել են գերիների մասին
Բաքվի բանտերում պահվող հայ գերիների հարցը բարձրաձայնվել է Ադրբեջանում։ Այսօր լրագրողների հետ զրույցում այս մասին ասաց Բաքու այցելած հայկական պատվիրակության անդամ Նաիրա Սուլթանյանը՝ հավելելով, որ գերիների մասին խոսել են նաև Ադրբեջանի նախագահի օգնական Հիքմեթ Հաջիևի հետ հանդիպման ժամանակ։
«Ո՛չ հայկական, ո՛չ ադրբեջանական կողմից մեզ վրա որևէ սահմանափակում չի եղել, որ այս հարցը չբարձրաձայնենք։ Միջազգային ատյաններում ու կառույցներում էլ այս հարցը բարձրաձայնել ենք ու շարունակում ենք բարձրաձայնել, և Կարմիր խաչի բացակայության հանգամանքով ևս մի ալիք նամակներ է գնացել։ Սակայն ադրբեջանական կողմի հետ այս հարցով ուղիղ խոսելը մեզ համար նոր իրավիճակ էր՝ հատկապես պարոն Հաջիևի առջև նստած։ Մենք փորձեցինք մեր խոսքը ձևակերպել դիվանագիտորեն և հիմնավորել նրբանկատ, որպեսզի կողմերի միջև առաջանա վստահության և փոխադարձ ընկալման զգացողություն, ինչի արդյունքում հույս ունենք, որ այս խնդիրներն ավելի արագ կլուծվեն»,– ասաց Սուլթանյանը։
Նաիրա Սուլթանյանի խոսքով՝ գերիների հստակ թիվ կամ մարդկանց կոնկրետ անունների հետ կապված իրենց պատասխան չեն տվել, սակայն Հայաստանի և Ադրբեջանի իշխանությունները իրենց վստահեցրել են, որ բանակցությունները կողմերի միջև այս հարցով շարունակվում են։
Ավելացնել նոր մեկնաբանություն