Հայրենիքը գնում է դեպի ինքնաքանդում, իսկ սփյուռքը՝ ինքնամաշում. նոր ղեկավար է պետք․ Արամ Առաջին
Մեծի Տանն Կիլիկիո կաթողիկոս Արամ Առաջին կաթողիկոսը վստահ է՝ ՝ հայ ազգը նոր ղեկավարների կարիք ունի, որպեսզի երկիրը դուրս գա ստեղծված իրավիճակից։ Վեհափառն այդ մասին հայտաևրարել է իր գահակալության 30-ամյակին նվիրված միջոցառման ժամանակ։
«Հայրենիքը գնում է դեպի ինքնաքանդում, իսկ սփյուռքը՝ ինքնամաշում։ Պետք է այս ամենին վերջ տալ համահայկական ուժերով։ Այսօր ապրում ենք մեր պատմության խաչմերուկում: Այս իրավիճակում մենք նոր ղեկավարների, նոր մոտեցումների, նոր կեցվածքի կարիք ունենք, որպեսզի դուրս գանք ներկայիս ճահճացած վիճակից: Կրկնություններով մենք չենք կարող առաջ գնալ, մասնավորապես ներկայիս ամենօրյա փոփոխություններով լի ժամանակներում։ Չենք կարող ինքնակենտրոն և ինքնանպատակ ապրել, պետք է բացենք մեր աչքերն ու տեսնենք, թե ուր է գնում մեր ժողովուրդն ու հայրենիքը»,- հայտարարել է Արամ Ա կաթողիկոսը։
Վեհափառը նշել է` աշխարհագրական պայմանները փոփոխվում են, ու այսօր կարիք կա, որ երիտասարդները նոր շունչ բերեն, քանի որ հենց նրանք են ճանաչում ներկայիս աշխարհը։ Ըստ կաթողիկոսի` մեծ տեղ պետք է տալ երիտասարդությանը, վստահել նրանց, որովհետև նրանք են կերտելու հայ ժողովրդի ապագան։
«Երբ նույն աթոռներին նույն անձինք են նստում, որոնք նույն մտածելակերպով են կաղապարված, աթոռն էլ է մաշվում, աթոռի վրա նստողներն էլ»,- ընդգծել է Արամ Ա-ն։
Նա ընդգծել է՝ Հայաստանի փրկության և վերականգնման մեջ սփյուռքի դերն էական է ու առաջնահերթ, և սփյուռքը կարող է այս ընթացքը կասեցնել` չնայած տարբեր երկրներում տարատեսակ դժվարությունների ու մարտահրավերների առաջ է կանգնած։ Այժմ, ըստ կաթողիկոսի, Մեծի Տանն Կիլիկիո կաթողիկոսությունը սկսել է սփյուռքի վերակազմակերպման գործընթաց, քանի որ Հայաստանի հզորացումը պայմանավորված է հենց սփյուռքի հզորացմամբ։
Ավելացնել նոր մեկնաբանություն