ՀՀ–ն չպետք է վտանգավոր մեսիջներ տա. ՔՊ քարտուղարը` կնիքներից Արարատը հեռացնելու մասին
ՀՀ-ն ելնում է իր պետական սիմվոլներից. ՀՀ դրոշմակնիքը պետք է արտահայտի պետության սիմվոլիզմը և զերծ լինի էմոցիոնալ, հուզական սիմվոլներից։ ԱԺ ճեպազրույցների ժամին այս մասին ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով անցակետերում կնիքներից Արարատ լեռան խորհրդանիշը հեռացնելուն։
Ինչպես հայտնել էինք, ՀՀ կառավարության որոշմամբ` 2025-ի նոյեմբերի 1–ից ուժի մեջ կմտնեն ՀՀ պետական սահմանը հատելիս անձնագրերում հայ սահմանապահների կողմից դրվող կնիքի տեխնիկական փոփոխությունները, ըստ որոնց, մասնավորապես, Արարատ լեռան պատկերն այլևս չի լինի։
«Մենք ամեն բան անում ենք, որ ՀՀ-ի վերաբերյալ տարընկալումներ չլինեն, և մեր կողմից կիրառվող սիմվոլիզմը, կնիքները և այլն ելնեն բացառապես պետականության սկզբունքից։ Մեր հարևանների հետ հարաբերություններում մենք ելնում ենք Ալմ Աթայի հռչակագրից, մեր յուրաքանչյուր գործողություն՝ լինի կնիքի, թե հայտարարության ձևով, պետք է վտանգավոր մեսիջներ չպարունակի»,- ասաց նա:
Հարցին` ՀՀ զինանշանից էլ կհանվի՞ Արարատը, Արթուր Հովհաննիսյանն ասաց, թե այս պահին նման քննարկում չկա։ Անդրադառնալով հայ-թուրքական հարաբերություններին` ՔՊ քարտուղարը հայտարարեց, թե իմիտացիա չկա, ավելին` նրան զարմացնում է հայ-թուրքական հարաբերություններում առաջընթացի բացակայության մասին հայտարարությունները։
«Թուրքիայի պաշտոնական ներկայացուցիչն այցելեց Հայաստան, բավականին դրական մթնոլորտում քննարկումներ են տեղի ունեցել։ Մենք հույս ունենք, որ մեր թուրք գործընկերների հետ հարաբերություններն առաջ կշարժվենք այն տրամաբանությամբ, որի մասին հրապարակային խոսվել է, և ձեռք բերված պայմանավորվածությունները հողի վրա իրականություն կդառնան», - նշեց Հովհաննիսյանը։
Նրա խոսքով` ՀՀ–ն Ադրբեջանի հետ խաղաղության պայմանագրի կնքումը և հայ–թուրքական հարաբերություններն իրարով չի պայմանավորում։
Ավելացնել նոր մեկնաբանություն