ՀՀ ԶՈւ-ում կանանց ներգրավումը ռազմավարական անհրաժեշտություն է․ ԱԽ քարտուղար
Հայաստանի Հանրապետության համար կանանց ներգրավումը զինված ուժերում ռազմավարական անհրաժեշտություն է։ Այս մասին «Արդյունավետ պաշտպանություն, անվտանգություն և կանանց մասնակցության խթանումը ՀՀ զինված ուժերում» թեմայով քննարկման ժամանակ ասաց ՀՀ անվտանգության խորհրդի քարտուղար Արմեն Գրիգորյանը։
«Աշխարհի տարբեր երկրներում իրականացված ուսումնասիրությունները ցույց են տալիս, որ կանանց ու տղամարդկանց հավասարակշռված մասնակցությունը ԶՈւ-ում ավելի արդյունավետ են դարձնում այդ կառույցները, իսկ բարդ խնդիրներն ավելի մեծ հաջողությամբ են լուծվում։ ՀՀ-ում կանանց ներգրավումն անվտանգության համակարգում` մասնավորապես զինված ուժերում, չի համարվում միայն խորհրդանշական քայլ, այն ռազմավարական անհրաժեշտություն է»,- նշեց Գրիգորյանը։
Նրա խոսքով՝ չնայած զգալի առաջընթացին, կանայք դեռևս փոքրամասնություն են պաշտպանության և անվտանգության ոլորտում` հատկապես ղեկավար պաշտոններում։ Շեշտեց՝ այս ոլորտներում կանանց ընդգրկումն ավելի շատ ապահովելու նպատակով ՀՀ կառավարությունը հետևողական քայլեր է ձեռնարկում։ Դրանցից է, օրինակ, կանանց կամավոր 6-ամսյա ժամկետային զինծառայության զորակոչվելը։
«Կանանց հնարավորություն է տրվում անցնել զինվորական պատրաստություն և ծառայությունը հաջողությամբ ավարտելու դեպքում ստանալ մոտ 2800 եվրոյի չափ գումար։ ՀՀ-ում կանանց ծառայության օրինակներից մեկը կանանց գումարտակի ձևավորումն է, ինչի համար հատուկ պայմաններ են ստեղծվել»,- ասաց Գրիգորյանը։
Իր ելույթում նա նշեց, որ ժամանակակից անվտանգային կառույցներին անհրաժեշտ են բազմազան կարողություններ՝ մշակութային զգայունություն, լեզվական կարողություն, կիբեռանվտանգության ոլորտի հմտություններ, ՏՏ տիրապետում, հոգեբանական և սոցիալական ընկալում, ինչպես նաև տեղական ինքնակառավարման համայնքների հետ համագործակցության ունակություն։
Ավելացնել նոր մեկնաբանություն