Մերցը հայտարարել է, որ բանակցում է Ուկրաինայի ՀՕՊ-ի համար մատակարարումների ավելացման շուրջ
Գերմանիայի կանցլեր Ֆրիդրիխ Մերցը հայտարարել է, որ Գերմանիան գործընկերների հետ բանակցում է Ուկրաինայի հակաօդային պաշտպանության համակարգերի մատակարարումների ավելացման շուրջ։
Նա նշել է, որ հոկտեմբերի 15-ին և 16-ին Բրյուսելում կայանալիք Եվրոպական խորհրդի հաջորդ նիստին ընդառաջ խորհրդակցություններ են ընթանում Ուկրաինային հետագա աջակցության հարցով։
«Մենք նաև քննարկում ենք Ուկրաինայի բյուջեին շատ կոնկրետ աջակցություն ցուցաբերելու հարցը»,– Բեռլինում Ղազախստանի նախագահ Կասիմ-Ժոմարտ Տոկաևի հետ համատեղ մամուլի ասուլիսում ասել է Մերցը։ Նա հավելել է, որ քննարկվող հարցերից է նաև Ուկրաինայի հակաօդային պաշտպանության համակարգի կատարելագործումը։
«Աշխարհի մի շարք երկրների պետությունների և կառավարությունների ղեկավարների հետ անձնական զրույցների ընթացքում ես նաև փորձում եմ նպաստել Ուկրաինայի հակաօդային պաշտպանության համար համապատասխան մատակարարումների կազմակերպմանը։ Այժմ դա ամենաթույլ օղակն է»,– հայտարարել է Գերմանիայի կանցլերը՝ նշելով, որ առաջիկա ձմեռը Ուկրաինայի համար կարող է «շատ ծանր» լինել։
Մերցը նշել է, որ Ուկրաինայի շուրջ իրավիճակը Տոկաևի հետ իր հանդիպման քննարկվող թեմաներից մեկն է եղել։ Գերմանիայի կառավարության ղեկավարի խոսքով՝ բանակցությունների ընթացքում ինքը ներկայացրել է այդ հարցում իր երկրի դիրքորոշումը և հայտարարել Կիևին հետագա աջակցության մասին։
Գերմանիան Ուկրաինայի խոշորագույն դոնորն է։ Բեռլինը 2022 թվականի փետրվարի 24-ից ի վեր Կիևին տրամադրել է շուրջ 43,3 միլիարդ եվրոյի մարդասիրական և 57,6 միլիարդ եվրոյի ռազմական օգնություն։ Այսպիսով, այդ ժամանակահատվածում Գերմանիայի կողմից Ուկրաինային տրամադրված երկկողմ օգնության ընդհանուր ծավալը գերազանցել է 100,9 միլիարդ եվրոն։
Ռուսական կողմը բազմիցս հայտարարել է, որ Կիևին զենքի մատակարարումները միայն երկարաձգում են Ուկրաինայում հակամարտությունը։
Ավելացնել նոր մեկնաբանություն