Ի՞նչ է ասել Չինաստանի պաշտպանության ղեկավարը Մոսկվայի համաժողովում

Չինաստանը ձգտում է ավելի ամուր ռազմական գործընկերություն ձևավորել Ռուսաստանի հետ ԱՄՆ-ին և Ճապոնիային հակազդելու համար, սակայն նա մտադիր է դադարեցնել նեգրավվածությունն ուկրաինական պատերազմին:

Սա առնվազն չինացի շատ վերլուծաբանների կարծիքն է այն բանից հետո, երբ պետական խորհրդական և ազգային պաշտպանության նախարար Լի Շանգֆուն ելույթ է ունեցել օգոստոսի 15-ին Միջազգային անվտանգության հարցերով մոսկովյան 11-րդ համաժողովում:

Հստակ ակնարկներ են հնչել, որոնք կարող են մեկնաբանվել որպես պաշտոնական ռազմական դաշինքի սկիզբ:

Հուլիսի 23-ին Չինաստանն ու Ռուսաստանն ավարտել են «Հյուսիս-փոխգործակցություն-2023» քառօրյա զորավարժությունները, որոնց ընթացքում երկու երկրները Ճապոնական ծովում տեղակայել են ավելի քան 10 ռազմանավ և 30 ռազմական ինքնաթիռ։

Օգոստոսի սկզբին առնվազն 11 ռուսական և չինական նավ, ըստ հաղորդագրության, ճանապարհորդել է Ալեուտյան կղզիների մոտ (ԱՄՆ հյուսիսային Ալյասկա նահանգի մաս), թեև հեռացել է առանց ԱՄՆ տարածքային ջրեր մտնելու:

Լին այս շաբաթ Մոսկվայում հանդիպել է իր ռուս գործընկեր Սերգեյ Շոյգուի հետ՝ քննարկելու երկկողմ ռազմական համագործակցությունը:

Շոյգուն իր ելույթում ասել է, որ երկու կողմերն ավելի սերտ կապեր ունեն, քան պարզապես ռազմավարական գործընկերությունը, և նրանց կապերը նույնիսկ ավելի կարևոր են, քան դաշինքը:

Այս հայտարարությունը հնչում է այն ժամանակ, երբ Ռուսաստանի տնտեսությունը ցույց է տալիս Ուկրաինայում տևական պատերազմի պատճառով աճող «սթրեսի» նշաններ:

«Ավելին, քան դաշինք»

Չինացի մեկնաբանները կարծում են, որ «ավելին, քան դաշինքը» այն չէ, ինչ իրականում ցանկանում է Պեկինը:

«Մենք հասկանում ենք, որ Ռուսաստանն այժմ միայնակ է ԱՄՆ-ի և Արևմուտքի ճնշման պատճառով, և որ նա ցանկանում է ընդգծել իր սերտ հարաբերությունները Չինաստանի հետ,- հոդվածում թեմային անդրադարձել է Հուբեյում բնակվող ռազմական մեկնաբան Լյու Լանը:- Սակայն ռուսական կողմը պետք է իմանա, որ Չինաստանն ու Ռուսաստանը դաշնակիցներ չեն, և այս պահին պարտադիր չէ, որ երկու կողմերը դաշինք կազմեն»։

Ըստ մեկնաբանի՝ եթե ռուս պաշտոնյաները զգույշ չլինեն իրենց ձևակերպումների մեջ, և՛ Ռուսաստանը, և՛ Չինաստանն անհարկի դժվարությունների կբախվեն։ Նա նշել է, որ երկու երկրները, բնականաբար, համաձայնության կհասնեն որոշ հարցերի շուրջ, քանի որ երկուսն էլ վտանգված են ԱՄՆ-ի գերիշխանության պատճառով:

«Ռուսաստանի հետ դաշինք կազմելը չի բխում մեր երկրի իրական շահերից: Եթե մենք կազմեինք այդ դաշինքը, ապա ուղղակիորեն կներգրավվեինք Ուկրաինայի հարցում և ավելի մեծ արտաքին ճնշման կենթարկվեինք։ Մեր երկրի ներկայիս ուշադրությունը դեռևս պետք է լինի տնտեսական զարգացման և ազգային վերամիավորման իրականացումը»,- ասել է նա՝ նկատի ունենալով Պեկինի՝ Թայվանը մայրցամաքում «կլանելու» խոստումը:

Լյուն մտավախություն ունի, որ պաշտոնական չին-ռուսական դաշինքի ստեղծումը կստիպի Եվրոպային ավելի հակվել դեպի ԱՄՆ և կխաթարի Չինաստանի ու Եվրոպայի միջև տնտեսական համագործակցությունը: Իսկ դա նաև պատրվակ կդառնա Ասիայում ՆԱՏՕ-ի ընդլայնման համար: