Բասկերի երկրի խորհրդարանում լսումներ են անցկացվել Արցախում տիրող իրավիճակի վերաբերյալ

Բասկերի երկրի խորհրդարանի եվրոպական հարցերի և արտաքին գործերի հանձնաժողովը լսումներ է անցկացրել Լեռնային Ղարաբաղում (Արցախում - խմբ․) տիրող իրավիճակի վերաբերյալ, որի ընթացքում Հայ բարեգործական ընդհանուր միության (ՀԲԸՄ) անդամ, իսպանահայ իրավաբան Լևոն Գրիգորյանը հանձնաժողովի խնդրանքով տեղեկացրել է Լեռնային Ղարաբաղում (Արցախում - խմբ․) տիրող իրավիճակի մասին։

«Արմենպրես»-ի հաղորդմամբ՝ Գրիգորյանը հայտարարել է, որ մարդու իրավունքների պաշտպանությունը պատասխանատվություն է, որը գերազանցում է քաղաքական, մշակութային և էթնիկ տարբերությունները:

«Անկախ մեր ծագումից՝ կարևոր է, որ մենք միավորվենք այս ընդհանուր գործում: Էթնիկ զտումներն ուղղակի ոտնձգություն են մարդկային արժանապատվության և ամենահիմնական իրավունքի` կյանքի իրավունքի նկատմամբ: Լեռնային Ղարաբաղի (Արցախի - խմբ․) բնակչության իրավունքները միջազգայնորեն պաշտպանության կարիք ունեն, իսկ Լեռնային Ղարաբաղի (Արցախի - խմբ․) կարգավիճակը չի կարող որոշվել Ադրբեջանի կողմից սկսված պատերազմով»,- ասել է իրավաբանը։

Գրիգորյանը հանդես է եկել Ադրբեջանի իշխանությունների կողմից մարդկության դեմ կատարված հանցագործությունների անկախ հետաքննության օգտին՝ պնդելով, որ այս իշխանությունների դեմ պատժամիջոցների կիրառումը վճռորոշ է Հայոց նոր ցեղասպանության հնարավորությունը կանխելու համար։