Ստեղծված իրավիճակից երկու ելք կա. կարելի է կամ ընդլայնել նախագծերը ԱՄՆ-ի հետ, կամ հրաժեշտ տալ նրանց. Քոչարյան
«Թրամփի ուղին» ունի տրանզիտային ներուժ, սակայն նրա նշանակությունը մի փոքր չափազանցված է։ Այս մասին այսօր լրագրողների հետ հանդիպմանն ասաց ՀՀ 2–րդ նախագահ Ռոբերտ Քոչարյանը։
Ռոբերտ Քոչարյանը քարտեզի վրա ցույց տվեց ամբողջ ճանապարհային ցանցը, թե ինչ հնարավորություն ունի Հայաստանը` որպես տրանզիտային երկիր։
Նա նշեց, որ Իրանը սահմաններ ունի 7 երկրի հետ, և միայն ՀՀ սահմանի վրա են հայտնվելու ամերիկացիներ։
«Բրավո. եթե որևէ մեկը մտածում է, որ Իրանում երջանիկ են սրա համար, խորը հիասթափություն պետք է ապրեն։ Նման որոշում կայացնելը չափազանց ռիսկային է ՀՀ համար։ Հիմա մեծ հարց է` Իրանի համար ի՞նչն է ավելի վտանագավոր` ԱՄն ներկայությունն այս սահմանի՞ն, թե՞ Ադրբեջանի ներկայությունն այս սահմանին։ Ես այդ հարցի պատասխանը չունեմ, համոզված եմ, որ ՀՀ կառավարությունը ևս չունի այդ հարցի պատասխանը»,- ընդգծեց նա։
Քոչարյանը նշեց` այս ճանապարհն իսկապես հետաքրքիր է Թուրքիայի համար իր աշխարհաքաղաքական ծրագրի շրջանակում` կապը Ադրբեջանի, Կենտրոնական Ասիայի հետ, իսկ Ադրբեջանի համար` կապը Նախիջևանի ու Թուրքիայի հետ։
«ԱՄն վերահսկողության տակ գտնվող այդ միջանցքը չափազանց հետաքրքիր է նաև իսրայելցիների համար` Իրանի դեպքում իրենց երկարատև ծրագրերի իրականացման հարցում»,- հայտարարեց ՀՀ 2-րդ նախագահը` ավելացնելով, որ ԱՄՆ-ն այս տարածաշրջանում կենսական շահեր ուղղակի չունի։
«Բա, լավ, ամոթ չե՞նք անում Հայաստանի ամենագրավիչ կտորը հանձնել ԱՄՆ–ին, ստեղծել ռիսկեր Իրանի հետ հարաբերություններում, հեքիաթ պատմել մեկ միլիարդանոց ծրագրի մասին, երբ դու ունես հնարավորություն 2–3 տարում այդ ճանապարհը կառուցելու»,- հայտարարեց Քոչարյանը։
Նրա խոսքով` «Թրամփի երթուղի» (TRIPP) նախագծի իրականացումը Հայաստանին կարող է ձեռնտու լինել իրադարձությունների զարգացման երկու տարբերակով։
«Առաջին տարբերակն է` փորձել ընդլայնել նախագիծը ԱՄՆ-ի մասնակցությամբ, քանի որ Վաշինգտոնի հետաքրքրությունը տարածաշրջանի նկատմամբ ակնհայտ է, սակայն դա, ամենայն հավանականությամբ, անհնար կլինի, քանի որ Ադրբեջանի նախագահ Իլհամ Ալիևը կմերժի այդ տարբերակը, որովհետև շահագրգռված չէ, որ Հայաստանը ևս ելք ստանա դեպի Իրան»,- նշեց Քոչարյանը։
Նրա խոսքով՝ երկրորդ տարբերակը, որն ամենաիրականն է, այն է, որ շնորհակալություն հայտնենք ԱՄՆ-ին նախաձեռնության համար, բայց միևնույն ժամանակ ինքնուրույն ճանապարհահատված կառուցենք:
Այս դեպքում էլ տեղամասը կարող է կոչվել «Թրամփի ուղի», սակայն այն կլինի Հայաստանի վերահսկողության տակ։
Քոչարյանն ընդգծեց նաև, որ Հայաստանի համար միակ շահավետ տարբերակը Երասխ–Ջուլֆա երկաթուղային հանգույցով, այնուհետև Ադրբեջանի տարածքով դեպի Ռուսաստան լիարժեք կապի ապահովումն է:
«Միայն այդ դեպքում Հայաստանը կարող է իրական օգուտ քաղել։ Իսկ եթե նա ուղղակի ճանապարհ տա Ադրբեջանին Նախիջևանի հետ կապ հաստատելու համար, դա անիմաստ նախագիծ կլինի՝ զրոյական արդյունքով»,- հայտարարեց նա։
Ավելացնել նոր մեկնաբանություն