Թուրքիայի ամենախոշոր ռազմական ավիավթարները
Թուրքիայի ռազմական ավիացիայի պատմության ընթացքում մի շարք խոշոր վթարներ են տեղի ունեցել։ Առաջին խոշոր դեպքերից մեկը գրանցվել է 1959 թ. Էսքիշեհիրում, երբ ուսումնական թռիչքի ժամանակ Թուրքիայի ռազմաօդային ուժերին պատկանող «C-47 Dakota» տիպի ինքնաթիռը կործանվել էր․ վթարի արդյունքում զոհվել էր 21 զինծառայող։ Այս մասին տեղեկացնում է ermenihaber.am-ը։
Երկու տարի անց, 1961 թ. Անկարայից օդ բարձրացած «C-47 Dakota» ինքնաթիռը կարճ ժամանակ անց ընկել և պայթել էր։ Դեպքի հետևանքով մահացել էր 25 օդային անձնակազմի անդամ, ինչը դարձավ այդ շրջանի ամենածանր կորուստներից մեկը։
1963 թ., կրկին Անկարայում, ռազմական ավիացիայի ուսանողներ տեղափոխող մեկ այլ «C-47 Dakota» ուսումնական ինքնաթիռ ընկել էր Այաշի ճանապարհի մոտ։ Թռիչքի պահին ինքնաթիռը հրդեհվել էր, ինչի հետևանքով 22 ապագա զինվորական օդաչու զոհվել էին։
1968 թ. Քոնիայի երկնքում, առաջադրանք իրականացնող «F-84F Thunderstreak» մարտական ինքնաթիռների խումբը թռիչքի ժամանակ բախվել էին միմյանց։ Ճակատագրական այս վթարը հանգեցրել էր 9 փորձառու օդաչուի մահվան և մնացել է որպես թուրքական մարտական ավիացիայի ամենածանր կորուստներից մեկը։
Թուրքական զինուժի պատմության ամենամեծ աղետներից մեկը գրանցվել է 1981 թ. Սպարտայում, երբ անձնակազմ և զինվորականներ տեղափոխող «C-130 Hercules» մեծ բեռնատար ինքնաթիռը խիտ մառախուղի պատճառով ընկել էր Էղրդիր լիճը։ Մոտ 10 օր տևած որոնումներից հետո պարզվեց, որ ինքնաթիռում գտնվող 30 զինծառայողներից ոչ մեկը չէր փրկվել։
Ամենածանր վթարներից մեկը տեղի է ունեցել 1993 թ. Բինգյոլում, երբ Սիլոպիից Անկարա մեկնող «C-130» ինքնաթիռը բախվել էր լեռանը։ Դեպքը դարձել է թուրքական ռազմաօդային ուժերի պատմության ամենակորստաբեր վթարներից մեկը՝ խլելով 37 զինծառայողի կյանք։
2001 թ. Աֆյոնքարահիսարի Աքդաղ շրջանում կրկին «C-130 Hercules» ինքնաթիռը կործանվել էր թույլ տեսանելիության և եղանակային բարդ պայմանների պատճառով։ Ուղևորների թվում էին թուրքական բանակի անձնակազմի անդամներ, և այս վթարի հետևանքով կյանքից զրկվել էր 34 զինվորական։
Վերջին տարիներին արձանագրված դեպքերը համեմատաբար փոքրաթիվ զոհերով են։ 2018 թ. Էսքիշեհիրում «T-38 Talon» ուսումնական ինքնաթիռը վթարի էր ենթարկվել, որի արդյունքում 2 օդաչու էր զոհվել։
2021 թ. Քոնիայում, «Թուրքական աստղեր» ցուցադրողական խմբի «NF-5» ինքնաթիռը վթարվել էր ուսումնական թռիչքի ժամանակ։
Տասնամյակների ընթացքում Թուրքիայի ռազմական ավիացիայում արձանագրվել է ավելի քան 10 խոշոր վթար։ Վերլուծությունները ցույց են տալիս, որ ամենաշատ մահվան ելքով դեպքերը գրանցվել են հենց «C-130 Hercules» բեռնատար ինքնաթիռների հետ կատարված վթարներում։ Վատ եղանակային պայմանները, տեխնիկական խնդիրները և մարդկային սխալները մատնանշվում են որպես այդ վթարների հիմնական պատճառներ։
Ավելացնել նոր մեկնաբանություն