Զինծառայության ժամկետի կրճատումը ոչ այնքան նախընտրական քարոզարշավ է, որքան հերթական խոշորագույն զիջումն Ադրբեջանին. Արմեն Այվազյան
Երեկ Փաշինյանը հայտարարեց, որ 2026 թվականի հունվարի 1-ից զինվորական ծառայության ժամկետը կրճատվում է՝ դառնալով 1,5 տարի։
Քաղաքական պատճառներից բացի, միգուցե Փաշինյանն իր այս հայտարարությամբ շոյում է բազմահազար ականջներ՝ մեր վարչապետը մտածում է մեր տղաների մասին, 2 տարվա փոխարեն՝ բանակում ծառայելը դարձնում է 1,5 տարի։ Առջևում էլ ընտրություններ են, պետք է սիրաշահել ընտրազանգվածին։
Քաղաքագիտության դոկտոր, պատմաբան Արմեն Այվազյանը զինվորական ծառայության ժամկետի կրճատումը դիտում է ոչ այնքան նախընտրական քարոզարշավ, որքան հերթական խոշորագույն զիջումն Ադրբեջանին։
Այդ քայլով կրճատվում է հայ զինվորների թվաքանակը, պակասելու է Հայոց բանակի մարտունակության մակարդակը։
«Նրանք, ովքեր 1,5 տարի հետո զինվորական հմտություններ են ձեռք բերելու, վերադառնալու են տուն։ Պայմանագրային զինծառայողները չեն կարող խնդիրը լուծել, որովհետև բանակում մեծ թվով պայմանագրայիններ չեն ներգրավվում, իսկ մենք կանգնած ենք ցեղասպանության վտանգի առաջ, ուստի՝ մեծաթիվ բանակի կարիք ունենք»,- պնդում է քաղաքագետը, որը տասնամյակներ շարունակ ուսումնասիրել է տարբեր դարաշրջաններում հայոց բանակի կազմավորման պատմությունը, հանգամանքները։ Պատմական ապացույցները բազմաթիվ են՝ եթե ունես մեծաթիվ զինվորներ ու հզոր բանակ, քեզ հետ հաշվի են նստում, քեզնից վախենում են։
Արմեն Այվազյանը բերում է Մեծ Բրիտանիայի, Գերմանիայի օրինակները։
«Անգամ Մեծ Բրիտանիայի, Գերմանիայի նման պետությունները, որոնք վաղուց անցել էին պայմանագրային ծառայության, այսօր մտադիր են զորակոչը վերականգնել, որովհետև կանգնած են մեծ պատերազմների առաջ։
Ալիևն այսօր հայտարարել է, թե թույլ է տալիս, որ Ադրբեջանի տարածքով հայկական բեռներ անցնեն։ Զինծառայության կրճատման մասին Փաշինյանի հայտարարությունը համընկնում է Ալիևի հայտարարության հետ։ Այն, որ իբր խաղաղություն է հաստատված, մեծ սուտ է»,- վստահեցնում է Արմեն Այվազյանը։
Ավելացնել նոր մեկնաբանություն