Իրանն աջակցում է հայ-ադրբեջանական բանակցություններին. Քանաանի

Իրանի Իսլամական Հանրապետության արտաքին գործերի նախարարության մամուլի խոսնակ Նասեր Քանաանին հայտարարել է՝ Իրանն աջակցում է Հայաստանի և Ադրբեջանի միջև բանակցությունների նոր փուլին։ Ըստ «Դետք»-ի՝ այս մասին տեղեկացնում է իրանական պետական IRNA լրատվական գործակալությունը։ 

Քանաանին միևնույն ժամանակ վերահաստատել է Հարավային Կովկասում կայուն խաղաղություն հաստատելու Թեհրանի պատրաստակամությունը։ Նրա խոսքով՝ Իրանն աջակցում է իր երկու հարևանների միջև տարաձայնությունների լուծման խաղաղ գործընթացին։

«Հայաստանի արտգործնախարարը երկկողմ հարաբերությունների շրջանակում ժամանել է Թեհրան՝ ի պատասխան իրանցի գործընկերոջ՝ Երևան կատարած այցի»,- ասել է նա։

Իրանի արտաքին քաղաքական գերատեսչության խոսնակը հայտնել է, որ Հայաստանի և Իրանի ԱԳ նախարարները կքննարկեն էներգետիկայի, տնտեսության, հյուպատոսական ծառայությունների ոլորտներում համագործակցությունը։

#Դետքի_հետագծով

Իրանի Իսլամական Հանրապետությունն աջակցում է տարածաշրջանում խաղաղություն հաստատելու քաղաքականությանը։ Այս համատեքստում իրանական կողմը պնդում է, որ բոլոր խնդիրները պետք է լուծվեն բացառապես տարածաշրջանային երկրների մասնակցությամբ` որևէ կերպ թույլ չտալով, որ դրանցում ներգրավվեն արտատարածաշրջանային երկրները։