Շվեյցարիայի գործադիր մարմինների կողմից արցախահայության վերադարձի վերաբերյալ համաժողովի մասին հայկական կողմին ուղղված առաջարկ չի եղել. ԱԳՆ

Հունվարի 31-ին Նիկոլ Փաշինյանի հրավիրած մամուլի ասուլիսի ժամանակ 168.am-ը Նիկոլ Փաշինյանին հարց էր ուղղել արցախահայության վերադարձի վերաբերյալ Շվեյցարիայի խորհրդարանի բանաձևի մասին։

Մենք մասնավորապես հետաքրքրվել էինք. «Հունվարի 21-ին Շվեյցարիայի Խորհրդարանի Վերին պալատի արտաքին հարաբերությունների հանձնաժողովն ընդունել է արցախահայության վերադարձի շուրջ միջազգային համաժողով հրավիրելու բանաձևը։ Դրանից առաջ էլ Շվեյցարիայի Խորհրդարանի Ստորին պալատն էր կողմ քվեարկել այս նախագծին։ Շվեյցարիայի արտաքին գործերի նախարարն այդ քվեարկությունից հետո իրենց խորհրդարանականների մոտ հրապարակավ հայտարարել էր, որ Հայաստանի և Ադրբեջանի կառավարությունները պաշտոնապես դեմ են արտահայտվել միջազգային այդ համաժողովի անցկացմանը: Ձեր սխալների արդյունքում արդեն Արցախ ենք կորցրել, արցախահայերը թողել են իրենց տներն ու դուրս են եկել, ինչո՞ւ եք դեմ արտահայտվել արցախահայերի վերադարձի շուրջ միջազգային համաժողով հրավիրելու բանաձևին, ինչո՞ւ եք խանգարում, ինչո՞ւ չեք աջակցում, որ այդ բանաձևն անցնի, առավել ևս, որ Շվեյցարիայի խորհրդարանը Հայաստանից դրա դիմաց ոչինչ չի խնդրում, իրենք են հետագայում բանակցելու Ադրբեջանի հետ»:

Լսելով հարցը՝ Նիկոլ Փաշինյանը պատասխանել էր, թե հարցի հետ ոչ մի անգամ չի առնչվել:

Ճշտող հարցին՝ Կառավարությունը որևէ կերպ դեմ չի՞ արտահայտվել դրան, Փաշինյանը պատասխանել էր. «Ես այդ թեմայի հետ առաջին անգամ եմ առնչվում, ինձ չի եկել-հասել այդպիսի թեմա, որ ես ինչ-որ ձևով ռեակցիա տայի: Բայց մյուս կողմից, եթե չեմ սխալվում, այդ թեմայի վերաբերյալ իմ հրապարակային դիրքորոշումն արտահայտել եմ»։

Այնուհետև Նիկոլ Փաշինյանը խոստացավ մեր հարցադրմանն անպայման գրավոր պատասխանել։

Մինչև փետրվարի 14-ը մենք սպասեցինք Նիկոլ Փաշինյանի խոստացած պատասխանին, սակայն պատասխան չեղավ, ուստի որոշեցինք նույնը հարցը ևս մեկ անգամ ուղղել Նիկոլ Փաշինյանին՝ ուղարկելով գրավոր հարցադրում։

Երեկ ԱԳ նախարարությունից տեղեկացրեցին, որ Նիկոլ Փաշինյանի աշխատակազմը նրան ուղղված մեր գրավոր հարցումը հասցեագրել է ԱԳՆ-ին, որպեսզի այդ գերատեսչությունը պատասխանի։

Նշեմ, որ բացի վերոնշյալ հարցից, Նիկոլ Փաշինյանին ուղղել էինք նաև հետևյալ հարցերը՝

2. Շուրջ 7 ամիս է՝ Չինաստանը Հայաստանում դեսպան չունի։ Նախ, ինչո՞վ է դա պայմանավորված, որ նման կարևորություն ունեցող գերտերության հետ Հայաստանի դիվանագիտական հարաբերություններն այդ վիճակում են, և դա աննախադեպ երևույթ է հայ-չինական հարաբերությունների պատմության ընթացքում:

3. Արդյոք Հայաստանը չի՞ պատրաստվում դուրս գալ հակաչինական կրոնական ազատության ալյանսից, որի մասին անգամ ԱՄՆ նախկին պետքարտուղար Պոմպեոն էր ասել, որ այդ ալյանսը հակաչինական բնույթ ունի: Առավել ևս, որ ըստ մասնագետների, փաստացի, այդ ալյանսն ավելի քան 4 տարի է՝ չի գործում, սակայն Հայաստանը շարունակում է ֆորմալ առումով դրա մաս կազմել:

Արտգործնախարարությունից մեր առաջին հարցին տվել են հետևյալ պատասխանը.

«Շվեյցարական կողմը, ինչպես և այլ միջազգային գործընկերներ, արտահայտում են իրենց պատրաստակամությունը՝ աջակցել Հայաստանի և Ադրբեջանի միջև հարաբերությունների կարգավորման գործընթացին, հանդես են գալիս տարբեր նախաձեռնություններով։

Հայտնում ենք, որ Ձեր կողմից վկայակոչվող Շվեյցարիայի կողմից համաժողովի անցկացման գաղափարը պատգամավորական է և դեռ քննարկվում է Շվեյցարիայի խորհրդարանի «Peace Forum for Nagorno Karabakh. Enable the return of the Armenians», համաժողովի անցկացման միջնորդությունը 2024 թվականի հունվարի 21-ին հավանություն է ստացել Շվեյցարիայի կանտոնների խորհրդի (խորհրդարանի Վերին պալատ), արտաքին հարաբերությունների հանձնաժողովի կողմից և հաջորդ փուլով դեռ քննարկվելու է հենց Կանտոնների խորհրդի կողմից։

Շվեյցարիայի գործադիր մարմինների կողմից այս համաժողովի վերաբերյալ հայկական կողմին ուղղված առաջարկ չի եղել, համապատասխանաբար՝ Հայաստանը հրաժարվելու կամ դեմ լինելու դիրքորոշում չի արտահայտել։

Հայտնում ենք նաև, որ Հայաստանի և Ադրբեջանի միջև հարաբերությունների կարգավորման գործընթացի, դրանում քննարկվող հիմնական հարցերի շուրջ, մեր միջազգային գործընկերների, այդ թվում՝ շվեյցարական կողմի հետ մենք ունենք շարունակական երկխոսություն, որի շրջանակներում ըստ հետագա զարգացումների, կշարունակենք ներկայացնել առանցքային խնդիրների հասցեագրման ուղղությամբ ներգրավվածության, աջակցության մեր տեսլականը»։