«Վաղ թե ուշ Արցախի հարցի շուրջ տեղի են ունենալու զարգացումներ, որոնց պետք է պատրաստ լինենք». Կարեն Միրզոյան
Նիկոլ Փաշինյանը վերջին 6,5 տարիների ընթացքում Արցախի հարցին տարբեր պիտակավորումներ է տվել, համեմատել մեկ՝ «շան պավադոկի» հետ, մեկ՝ «ճոճվող սուր Հայաստանի գլխին», իսկ այս շաբաթվա սկզբին էլ համեմատեց «9 ամսական հղիի» հետ։
«Որևէ մեկը կարող է հղի լինել 9 ամիս, 9 ամիս անց պետք է մի բան տեղի ունենա՝ կամ պետք է ծնվի երեխան, կամ չծնվի՝ մեծ հավանականությամբ կրողի մահը պատճառելով, կամ պետք է ծնվի կեսարյան հատումով, կամ՝ բնական ճանապարհով, կամ կենդանածին պետք է լինի, կամ՝ մեռելածին, կամ տղա պետք է լինի, կամ՝ աղջիկ։
Այն, որ այս հղիությունը պետք է ևս 9 ամսով երկարացնենք՝ դա, կներեք, աբսուրդ մոտեցում է, ու, այնուամենայնիվ, շատ կարևոր է արձանագրել՝ այն, ինչ տեղի է ունեցել, ի՞նչ է, ինչքանո՞վ է ճիշտ»,- ԱԺ ամբիոնից հայտարարել է Նիկոլ Փաշինյանը։
Այս ամենի համատեքստում Նիկոլ Փաշինյանը որևէ խոսք չասաց Արցախից բռնի տեղահանված հայերի, նրանց վերադարձի իրավունքների մասին։
Փոխարենը՝ Ադրբեջանը տարբեր մակարդակներում բարձրացնում է ադրբեջանցիների՝ Հայաստան վերադառնալու հարցը։ Ալիևը նաև հայտարարել էր, որ ՀՀ իշխանությունը «պետք է» սկսի բանակցել «Արևմտյան Ադրբեջանի համայնքի» հետ։
Արցախի Հանրապետության արտաքին գործերի նախկին նախարար Կարեն Միրզոյանի խոսքով՝ Նիկոլ Փաշինյանի ասածների մեջ որևէ տրամաբանություն չկա, հետևաբար՝ անիմաստ է մեկնաբանել նրա մտքի զեղումները։
«Նրա ասածներից այստեղ որևէ բան մեկնաբանման ենթակա չէ։ Սա արվում է հատուկ նպատակով՝ հատուկ թիրախային խմբի համար։ Այս հայտարարությունը որևէ առնչություն չունի խնդրի, խնդրի արմատների ու իրականության հետ»,- 168.am–ի հետ զրույցում նշեց Կարեն Միրզոյանը։
Նրա բնորոշմամբ՝ ակնհայտ է, որ ՀՀ իշխանություններն իրենց համար արդեն փակել են Արցախի հարցը։
«Իմ գնահատմամբ՝ այսօր իշխանությունների օրակարգում կա մեկ հարց՝ ապահովել իրենց վերարտադրությունը, երջանիկ գոյատևումն իշխանական կերակրատաշտակի մոտ։
Կարծում եմ՝ իրենք սխալվում են՝ անկախ իրենց տարօրինակ հայտարարություններից, Արցախի հարցը գոյություն ունի։ Վաղ թե ուշ Արցախի հարցի շուրջ տեղի են ունենալու զարգացումներ, որոնց մենք պետք է պատրաստ լինենք»,-եզրափակեց Կարեն Միրզոյանը։
Ավելացնել նոր մեկնաբանություն