Զելենսկին հաստատել է, որ ապրիլի 23-ին Լոնդոնում բանակցություններ կմեկնարկեն հրադադարի շուրջ
Ուկրաինայի, Մեծ Բրիտանիայի, Ֆրանսիայի և Միացյալ Նահանգների ներկայացուցիչներն ապրիլի 23-ին կհանդիպեն Լոնդոնում՝ քննարկելու ռուս-ուկրաինական հակամարտության կարգավորման հարցը։ «Արմենպրես»-ի փոխանցմամբ՝ այս մասին Մեծ Բրիտանիայի վարչապետ Քիր Սթարմերի հետ հեռախոսազրույցից հետո X սոցիալական հարթակում գրառում է կատարել Ուկրաինայի նախագահ Վլադիմիր Զելենսկին։
«Արդեն այս չորեքշաբթի մեր ներկայացուցիչները կաշխատեն Լոնդոնում։ Ուկրաինա, Մեծ Բրիտանիա, Ֆրանսիա, Միացյալ Նահանգներ. մենք պատրաստ ենք շարունակել շարժվել հնարավորինս կառուցողական կերպով, ինչպես արել ենք նախկինում՝ անվերապահ հրադադարի հասնելու համար՝ հետագայում իրական և տևական խաղաղության հաստատմամբ»,- գրել է նա։
Ուկրաինայի նախագահը նաև շնորհակալություն է հայտնել իր երկրին օգնող բոլոր գործընկերներին: «Անվերապահ հրադադարը պետք է լինի առաջին քայլը դեպի խաղաղություն, և այս Զատիկը ցույց տվեց, որ հենց Ռուսաստանի գործողություններն են պատճառ հանդիսանում, որ պատերազմը ձգձգվի»,- նշել է Զելենսկին։
Նա հավելել է, որ Քիր Սթարմերի հետ քննարկել է նաև «համատեղ աշխատանքը եվրոպական անվտանգության ձևաչափերում»։Ուկրաինական «Պրավդա» պարբերականի տեղեկացմամբ՝ Լոնդոնում կայանալիք հանդիպումը կլինի երկրորդը Փարիզից հետո, որտեղ ԱՄՆ-ն, Ուկրաինան և նրանց եվրոպացի դաշնակիցները կքննարկեն ռուս-ուկրաինական պատերազմում հրադադարի հասնելու շուրջ ամերիկյան ծրագիրը:
Ըստ «ՌԲԿ-Ուկրաինա»-ի՝ լոնդոնյան բանակցություններին Ուկրաինայի պատվիրակությունը կներկայացնեն չորս բարձրաստիճան պաշտոնյաներ՝ նախագահի աշխատակազմի ղեկավար Անդրեյ Երմակը, նախագահի աշխատակազմի ղեկավարի տեղակալ Պավել Պալիսան, պաշտպանության նախարար Ռուստեմ Ումերովը, արտաքին գործերի նախարար Անդրեյ Սիբիհան։Աղբյուրի համաձայն՝ Միացյալ Նահանգների կողմից Մեծ Բրիտանիա կմեկնեն պետքարտուղար Մարկո Ռուբիոն և ԱՄՆ նախագահի հատուկ բանագնացներ Սթիվեն Ուիթքոֆը և Քիթ Քելոգը։
Իսկ եվրոպական երկրներից ներկա կլինեն արտգործնախարարները և ազգային անվտանգության հարցերով խորհրդականները։Ապրիլի 20-ին Վոլոդիմիր Զելենսկին առաջարկել էր հրադադարի նոր ձևաչափ։ Այն նախատեսում է առնվազն 30 օրով հրաժարվել քաղաքացիական ենթակառուցվածքների վրա անօդաչու թռչող սարքերի և հրթիռների հեռահար հարվածներից:
Ավելացնել նոր մեկնաբանություն