Իսրայելի ուժերը զավթել են Գազա օգնություն տեղափոխող նավը, որի վրա էր նաև շվեդ ակտիվիստ Գրետա Թունբերգը
Իսրայելի ուժերը զավթել են մարդասիրական նավը, որը փորձել էր խախտել Գազայի վրա սահմանված նավային շրջափակումը, և այժմ նավը՝ իր 12 հոգանոց անձնակազմով, որոնց թվում է նաև ակտիվիստ Գրետա Թունբերգը, ուղևորվում է Իսրայելի նավահանգիստ, կիրակի հայտնել է երկրի ԱԳՆ-ն:
Բրիտանական դրոշի ներքո գործող Madleen նավը, որը ղեկավարում է պաղեստինամետ «Ազատության նավատորմի կոալիցիան», նպատակ ուներ երկուշաբթի օրը Գազա հասցնել խորհրդանշական չափով մարդասիրական օգնություն և ուշադրություն հրավիրել այնտեղ ստեղծված հումանիտար ճգնաժամի վրա։
Սակայն, ինչպես հաղորդել է կոալիցիան, մինչև ափ հասնելը՝ գիշերը, նավը «գրոհվել է»։ Իսրայելի արտաքին գործերի նախարարությունն ավելի ուշ հաստատել է, որ նավը գտնվում է իսրայելական վերահսկողության ներքո։
«Ուղևորները շուտով կվերադառնան իրենց երկրներ», - գրել է նախարարությունը X սոցիալական հարթակում։
Հետագայում նախարարությունն ավելացրել է, որ բոլոր ուղևորները անվտանգ են և չեն վնասվել։
12 հոգանոց անձնակազմի կազմում են շվեդ բնապահպան ակտիվիստ Գրետա Թունբերգը և Եվրախորհրդարանի ֆրանսիացի պատգամավոր Ռիմա Հասանը։
«Ազատության նավատորմի անձնակազմը ձերբակալվել է իսրայելական բանակի կողմից միջազգային ջրերում՝ առավոտյան ժամը 2-ի սահմաններում», - գրել է Հասանը X-ում:
Նավը տեղափոխում էր փոքր քանակությամբ մարդասիրական օգնություն, այդ թվում՝ բրինձ և մանկական կեր։ Իսրայելի ԱԳՆ-ն նշել է, որ այդ օգնությունը կփոխանցվի Գազա՝ իրական մարդասիրական ուղիներով։
Իսրայելի պաշտպանության նախարար Իսրայել Կացը կիրակի օրը բանակին հրահանգել էր թույլ չտալ Madleen-ին հասնել Գազա՝ այդ առաքելությունն անվանելով ««Համաս»-ի օգտին ուղղված քարոզչական գործողություն»։
Իսրայելը Գազայի վրա նավային շրջափակում է սահմանել 2007 թվականից, երբ Արևմուտքի կողմից ահաբեկչական ճանաչված «Համաս» խմբավորումն այնտեղ վերցրել է իշխանությունը:
Ավելացնել նոր մեկնաբանություն