Իրանի հետ հարաբերությունների ճիշտ կառուցումն անվտանգային լրացուցիչ բարձիկ կտա․ Ոսկանյան
Հայաստանի հետ հարաբերություններն Իրանի համար ռազմավարական և անգամ կենսական նշանակություն ունեն։ Sputnik Արմենիայի հետ զրույցում այս մասին ասաց իրանագետ, ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը՝ մեկնաբանելով ՀՀ անվտանգության խորհրդի քարտուղար Արմեն Գրիգորյանի այցն ու հանդիպումներն Իրանում։
Նրա կարծիքով՝ հաշվի առնելով այն նոր մարտահրավերները, որ ի հայտ են եկել Հարավային Կովկասում Արցախի բռնազավթումից և թուրքական ներկայության ավելացումից հետո, Հայաստանն իր կարևորությունն Իրանի համար աշխարհաքաղաքական իմաստով ոչ միայն պահպանում է, այլև ավելացրել է։ Իրանագետի խոսքով՝ ոչ պակաս կարևոր հանգամանք է նաև Իրան-ԵԱՏՄ առևտրային համաձայնագրի ուժի մեջ մտնելը, ինչն Իրանի համար Հայաստանը վերածում է կարևոր դարպասի դեպի ԵԱՏՄ տարածք։
«Ուստի բոլոր բաղադրիչներով՝ թե՛ աշխարհաքաղաքական, թե՛ անվտանգային, թե՛ տնտեսական, Հայաստան-Իրան հարաբերությունները չափազանց կարևոր են»,- շեշտեց Ոսկանյանը։
ԱԽ քարտուղար Արմեն Գրիգորյանի հետ հանդիպման ժամանակ Իրանի ազգային անվտանգության գերագույն խորհրդի քարտուղար Ալի Աքբար Ահմադիանը հայտարարել էր, որ Իրանը թույլ չի տա թշնամիներին որևէ վնաս հասցնել երկու հարևանների միջև լավ հարաբերություններին։
Իրանագետի խոսքով՝ ամեն ինչ շատ պարզ է, և այս խոսքերն առաջնահերթ վերաբերում են ադրբեջանա–թուրքական նկրտումներին, որոնք բազմաբաղադրիչ են, հիբրիդային։
«Այդ շարքում առաջնային վտանգ և մարտահրավեր է, այսպես կոչված, «թուրանական միջանցքը», որն ադրբեջանական կողմը կոչում է «Զանգեզուրյան միջանցք», և պարբերական սպառնալիքներն այդ «միջանցքն» ուժով ստանալու մասին»,- նշեց Ոսկանյանը։
Ըստ նրա՝ թեպետ վերջին շրջանում այդ սպառնալիքները որոշակիորեն թուլացել են, ինչը պայմանավորված է նաև աշխարհաքաղաքական իրավիճակով, բայց վտանգը շարունակում է պահպանվել։
«Այս իրավիճակում առաջնահերթ խնդիրը Հայաստան-Իրան ցամաքային անվտանգ կապի և հայ-իրանական սահմանի անխախտ բնույթն է, ուստի իրանական կողմն այս հարցում չափազանց շահագրգիռ է»,- ասաց իրանագետը։
Ամբողջական հարցազրույցը` սկզբնաղբյուր կայքում։
Ավելացնել նոր մեկնաբանություն